ఆంధ్రప్రదేశ్లో ఉద్దేశపూర్వకంగా హింసాత్మక వాతావరణాన్ని సృష్టించి ప్రభుత్వాన్ని అపఖ్యాతిపాలుచేయాలనే ప్రయత్నం వైఎస్సార్ కాంగ్రెస్ పార్టీ చేస్తోందని తెలుగుదేశం పార్టీ అధ్యక్షుడు, ముఖ్యమంత్రి నారా చంద్రబాబు నాయుడు ఆరోపించారు. అధికారాన్ని కోల్పోయిన అసహనంతో వైఎస్సార్సీపీ అస్తవ్యస్త రాజకీయాలకు దిగుతోందని ఆయన అన్నారు. మంత్రులు, పార్టీ సీనియర్ నేతలతో నిర్వహించిన టెలికాన్ఫరెన్స్లో చంద్రబాబు మాట్లాడుతూ, వైఎస్సార్సీపీ నేతలు దూషణాత్మక వ్యాఖ్యలతో ఉద్రిక్తతలు రెచ్చగొట్టే ప్రయత్నం చేస్తున్నారని విమర్శించారు. రాష్ట్రంలో అశాంతి సృష్టించడమే వారి అసలు లక్ష్యమని ఆయన ఆరోపించారు.
రాష్ట్రాన్ని అభివృద్ధి చేయడమే లక్ష్యం: చంద్రబాబు
తిరుమల లడ్డూ ప్రసాదంలో కల్తీ ఆరోపణలపై రాజకీయంగా సున్నితమైన అంశాన్ని ప్రస్తావించిన చంద్రబాబు, ఈ వివాదంలో వైఎస్సార్సీపీ చేతికి చిక్కిందని వ్యాఖ్యానించారు. ప్రజలు ఇప్పటికే ఆ పార్టీ తీరును గమనించి తీవ్రంగా ఖండిస్తున్నారని చెప్పారు. తమ పాపాలను కప్పిపుచ్చుకునేందుకే కుట్రలు, ఆందోళనలు చేస్తున్నారని ఆరోపించారు. ప్రభుత్వ ప్రధాన లక్ష్యం పెట్టుబడులు ఆకర్షించి రాష్ట్రానికి దీర్ఘకాలిక అభివృద్ధిని తీసుకురావడమేనని చంద్రబాబు స్పష్టం చేశారు. ఈ మార్పును జీర్ణించుకోలేక వైఎస్సార్సీపీ నేతలు కావాలనే అడ్డంకులు సృష్టిస్తున్నారని అన్నారు.
ఈ నేపథ్యంలో టీడీపీ కార్యకర్తలు సంయమనం పాటించాలని, వైఎస్సార్సీపీ ఉచ్చులో పడొద్దని చంద్రబాబు హితవు పలికారు. తప్పు చేసిన వారిపై చట్టప్రకారం కఠిన చర్యలు ఉంటాయని స్పష్టం చేస్తూనే, పార్టీ శ్రేణులు చట్టాన్ని చేతుల్లోకి తీసుకోవద్దని హెచ్చరించారు. హింస, విధ్వంసం, అవినీతిపై పుట్టిన పార్టీ వైఎస్సార్సీపీ. వారి ఉచ్చులో పడితే మనకూ వారికి తేడా ఉండదు, అంటూ చంద్రబాబు పార్టీ శ్రేణులను అప్రమత్తం చేశారు.
స్పందించండి