Natu Natu Song : ఇద్దరు స్టార్ హీరోల‌తో సినిమా చేయాలంటే అది రిస్క్‌తో కూడుకున్న ప‌ని. ఇరువురు హీరోల అభిమానులని మెప్పించ‌డం అనేది పెద్ద టాస్క్‌. అయితే అలాంటి టాస్క్‌ని హ్యాపీగా స్వీక‌రించాడు రాజమౌళి. ఎన్టీఆర్, రామ్ చరణ్ ప్ర‌ధాన పాత్ర‌ల‌లో ఆర్ఆర్ఆర్ సినిమాను తెర‌కెక్కించాడు. ఈ సినిమా బాక్సాఫీస్ ద‌గ్గ‌ర వెయ్యి కోట్ల వ‌సూళ్లు రాబ‌ట్టింది. అంతేకాదు ఇంటా బ‌య‌టా కూడా మంచి ప్ర‌శంస‌లు అందుకుంది. అయితే గుడ్డు మీద ఈక‌లు పీకే వాళ్లు ఏదో వంక చూపిస్తూ ట్రోల్ చేస్తూనే ఉన్నారు. తాజాగా నాటు నాటు సాంగ్ విష‌యంలో ట్విట్ట‌ర్ వేదిక‌గా వార్ న‌డుస్తోంది.
తాజాగా నాటు నాటుకు చెందిన వీడియో సాంగ్ ను మేకర్స్ రిలీజ్ చేశారు. ఇక ఈ సాంగ్ లో ఎన్టీఆర్, చరణ్ ల డాన్స్ ను చూస్తూ ప్రేక్షకులు మైమరిచిపోతున్నారు . ఇద్దరు స్టార్ హీరోలు అలా డాన్స్ చేస్తుంటే చూడడానికి రెండు కళ్లు చాలడం లేదంటున్నారు అభిమానులు. బ్రిటిష్ వారి ముందు తెలుగు నాటును చూపించి మెప్పించారు. ఈ సాంగ్ కోసం రాజమౌళి ఎంతో కష్టపడినట్లు తెలిపారు. ఈ సాంగ్ కోసం మేము పడ్డ కష్టం అంతా ఇంతా కాదని.. చరణ్, తారక్ ఇంటర్వ్యూల‌లో చెప్పిన విషయం తెలిసిందే. అయితే ఈ ఇద్ద‌రిలో ఎవ‌రు బాగా చేశారు.. అనే దానిపై ట్విట్ట‌ర్ వేదిక‌గా వార్ న‌డుస్తోంది.
ఇద్దరు స్టార్స్ డ్యాన్స్ క‌దలిక‌ల మ‌ధ్య సింక్ కాని స్టెప్స్ ఎత్తి చూపుతూ విమ‌ర్శ‌లు గుప్పిస్తున్నారు. ఫాస్ట్ బీట్‌లో ఇద్దరు హీరోల డ్యాన్స్ విష‌యంలో చాలా తేడాలు గ‌మ‌నించారు. ఈ సాంగ్ కోసం 17 టేకులు చేయించాన‌ని చెప్పిన రాజమౌళి మ‌రి ఇంత నాన్ సింక్‌గా ఎలా చూపించాడంటూ కొంద‌రు విమ‌ర్శిస్తున్నారు.
ఇద్దరు హీరోల్లో రెండు అంశాల కోసం బాగా మాట్లాడుకుంటున్నారు. ఒకటి ఎన్టీఆర్ మెరుపు వేగంతో చేసిన డాన్స్ మూమెంట్స్ కాగా రెండోది చరణ్ ఈ సాంగ్ లో చూపించిన గ్రేస్.. పలు సందర్భాల్లో తాను పలికించిన హావ భావాలు. ఈ సాంగ్ వచ్చాక అందరూ ఆయా అంశాల కోసమే ఎంతగానో మాట్లాడుకుంటున్నారు. మొత్తానికి అయితే ఈ సాలిడ్ సాంగ్ మళ్లీ ఇలా హాట్ టాపిక్‌గా మారిపోయింది.
