జూన్ 19 శుక్రవారం బాక్సాఫీస్ వద్ద ఆసక్తికరమైన పోరు కనిపించనుంది. తెలుగు, డబ్బింగ్ చిత్రాలు కలిపి పలు సినిమాలు ప్రేక్షకుల ముందుకు వస్తున్నాయి. వీటిలో సమంత రీఎంట్రీ మూవీ ప్రత్యేక ఆకర్షణగా నిలుస్తుండగా, హర్షిత్ రెడ్డి, రష్మిక మందన్నకు కూడా కీలకమైన విడుదలలు ఉన్నాయి. మూడేళ్ల విరామం తర్వాత సమంత మా ఇంటి బంగారం చిత్రంతో మళ్లీ వెండితెరపై కనిపించనుంది. బి.వి. నందిని రెడ్డి దర్శకత్వం వహించిన ఈ చిత్రాన్ని సమంత స్వయంగా నిర్మించారు. దర్శకుడు రాజ్ నిడిమోరుతో వివాహం అనంతరం ఆమె నుంచి వస్తున్న తొలి థియేట్రికల్ విడుదల ఇదే కావడం విశేషం. ఈ సినిమాపై ఇప్పటికే మంచి అంచనాలు ఏర్పడ్డాయి. భారత్తోపాటు ఉత్తర అమెరికాలో కూడా అడ్వాన్స్ బుకింగ్స్కు మంచి స్పందన లభించడం సమంత క్రేజ్ను మరోసారి నిరూపిస్తోంది. ప్రధానంగా మహిళా పాత్రలతో రూపొందిన ఈ యాక్షన్ డ్రామా కొత్త తరహా కథనంతో ప్రేక్షకులను ఆకట్టుకుంటుందని చిత్రబృందం చెబుతోంది.
అలరించనున్న దీవానా, కాక్టెయిల్ 2..
షార్ట్ ఫిల్మ్స్తోపాటు శుభం, కల్కి 2898 ఏడీ వంటి చిత్రాల్లో సహాయ పాత్రల్లో కనిపించిన హర్షిత్ రెడ్డి ఇప్పుడు దీవానా చిత్రంతో హీరోగా ప్రేక్షకుల ముందుకు వస్తున్నారు. గీతా ఆర్ట్స్ నిర్మాణంలో రూపొందిన ఈ సినిమాకు ఇప్పటికే ప్రీమియర్ షోలు నిర్వహించగా, సానుకూల స్పందన లభించినట్లు సమాచారం. శ్రీకాంత్ సంగిశెట్టి దర్శకత్వం వహించిన ఈ రొమాంటిక్ డ్రామా వన్సైడ్ లవ్ స్టోరీ నేపథ్యంగా సాగుతుంది. ఇందులో స్నేహ మణిమేఘలై కథానాయికగా నటించారు. రష్మిక మందన్న నటించిన తాజా హిందీ చిత్రం కాక్టెయిల్ 2 కూడా ఈ వారమే ప్రేక్షకుల ముందుకు వస్తోంది. షాహిద్ కపూర్ ప్రధాన పాత్రలో నటించిన ఈ చిత్రం గతంలో ఘన విజయం సాధించిన కాక్టెయిల్ కు సీక్వెల్గా రూపొందింది. ఆధునిక ప్రేమకథ నేపథ్యంతో తెరకెక్కిన ఈ చిత్రంలో కృతి సనన్, రష్మిక మందన్న సన్నిహిత స్నేహితులుగా కనిపిస్తారు. సంక్లిష్టమైన సంబంధాల మధ్య సాగే లవ్ ట్రయాంగిల్ కథ ఈ సినిమాకు ప్రధాన ఆకర్షణగా చెబుతున్నారు. ప్రముఖ తారాగణం, ఫ్రాంచైజీ విలువ కారణంగా విడుదలకు ముందే ఈ సినిమాపై మంచి బజ్ ఏర్పడింది.
వడ్డే నవీన్ మళ్లీ తెరపై..
సీనియర్ నటుడు వడ్డే నవీన్ ట్రాన్స్ఫర్ త్రిమూర్తులు చిత్రంతో మళ్లీ ప్రేక్షకులను అలరించేందుకు ప్రయత్నిస్తున్నారు. అయితే ప్రచార కార్యక్రమాలు పరిమితంగా ఉండటంతో ఈ సినిమాపై పెద్దగా ఆసక్తి కనిపించడం లేదు. తమిళ నటుడు విజయ్ ఆంటోని వంద దేవుళ్లు చిత్రంతో మరోసారి ప్రేక్షకుల ముందుకు వస్తున్నారు. బిచ్చగాడు దర్శకుడు శశితో ఆయన మళ్లీ కలిసి పనిచేయడం ఈ సినిమాకు ప్రత్యేక ఆకర్షణగా మారింది. అలాగే బాలన్ అనే డబ్బింగ్ చిత్రం కూడా ఈ వారాంతంలో థియేటర్లలో విడుదల కానుంది. ఇలా ఈ శుక్రవారం వివిధ జానర్లకు చెందిన సినిమాలు ప్రేక్షకులకు వినోదాన్ని అందించేందుకు సిద్ధమయ్యాయి.
స్పందించండి