Poorna : ఇటీవల కాలంలో సినిమా తారల పెళ్లిళ్లు పెటాకులవడం మనం చూస్తూనే ఉన్నాం. ఇప్పటికే చాలా మంది తారలు తమ వివాహ బంధానికి గుడ్ బై చెప్పి సినిమాలతో బిజీ అయిపోతున్నారు. మరికొందరైతే ఎంగేజ్ మెంట్ చేసుకున్న తర్వాత పెళ్లి క్యాన్సిల్ చేసుకుంటున్నారు. రష్మిక, మెహరీన్ ఇలా కొంతమంది పెళ్లిపీటలెక్కకుండానే విడిపోయారు. తాజాగా ఈ లిస్ట్ లోకి ఓ అమ్మడు వచ్చి చేరిందని వార్తలు వినిపిస్తున్నాయి.
రఘుబాబు తెరకెక్కించిన అవును సినిమాతో మంచి గుర్తింపు తెచ్చుకుంది హీరోయిన్ పూర్ణ. ఆ తర్వాత పలు సినిమాల్లో నటించినప్పటికీ ఆశించిన స్థాయిలో క్లిక్ అవ్వలేక పోయింది. చాలా రోజుల తర్వాత రీసెంట్ గా బాలయ్య బాబు నటించిన అఖండ సినిమాలో కీలక పాత్రలో నటించి మెప్పించింది పూర్ణ.
అయితే ఈ ఏడాది జూన్ నెలలో తనకు కాబోయే భర్తను ఆమె పరిచయం చేసిన సంగతి తెలిసిందే. షానిద్ అసిఫ్ ఆలీ అనే వ్యక్తితో ఎంగేజ్మెంట్ జరిగినట్లు ఆమె సోషల్ మీడియా వేదికగా ప్రకటించింది. కాబోయే భర్తతో కలిసి దిగిన ఫొటోలను అభిమానులతో పంచుకుంది. అయితే ఆ తరువాత పెళ్లిపై ఎలాంటి అప్డేట్ ఇవ్వలేదు. దీంతో పూర్ణకు, షానిద్కు మధ్య విభేదాలు వచ్చాయని.. నిశ్చాతార్థం క్యాన్సిల్ అయిందంటూ సోషల్ మీడియాలో వార్తలు స్ప్రెడ్ చేశారు కొంతమంది.
ఈ నేపథ్యంలో పెళ్లి రద్దయిందంటూ వస్తున్న రూమర్స్ కి చెక్ పెట్టింది పూర్ణ. తనకు కాబోయే భర్తతో కలిసి దిగి ఉన్న ఫొటోను షేర్ చేస్తూ.. అతడెప్పటికీ నా వాడే అంటూ క్యాప్షన్ ఇచ్చింది. దీంతో అందరి నోళ్ళకు తాళం పడినట్టైంది. ఇటు బుల్లితెరపై షోలతో బిజీగా ఉంటోంది పూర్ణ. త్వరలో దసరా, బ్యాక్ డోర్ సినిమాలతో ప్రేక్షకుల ముందుకు రానుంది.
