నటుడు, టీవీకే పార్టీ అధినేత విజయ్ భార్య సంగీత చెంగల్ పట్టు జిల్లా కోర్టులో మరో కొత్త పిటిషన్ దాఖలు చేశారు. విడాకుల కేసు తుది తీర్పు వచ్చే వరకు దాంపత్య గృహంలో నివసించేందుకు అనుమతి ఇవ్వాలని కోరుతూ ఆమె ఈ తాజా పిటిషన్ను కోర్టులో సమర్పించారు. పిటిషన్లో సంగీత పేర్కొన్నదేమిటంటే.. తాను యూకే పౌరురాలిని కావడంతో చెన్నైలో తగిన నివాస సౌకర్యాలు లేవని తెలిపారు. అందువల్ల విడాకుల విచారణ పూర్తయ్యే వరకు ప్రస్తుతం ఉన్న దాంపత్య గృహంలో నివసించేందుకు అనుమతిస్తూ తాత్కాలిక ఉత్తర్వులు జారీ చేయాలని ఆమె కోర్టును అభ్యర్థించారు. విజయ్ ఇటీవల చెన్నైలో జరిగిన ఓ వివాహ విందులో నటి త్రిషా కృష్ణన్తో కలిసి బహిరంగంగా కనిపించిన కొన్ని రోజుల తర్వాత ఈ తాజా పిటిషన్ దాఖలు కావడం గమనార్హం. ఈ ఘటన సోషల్ మీడియాలో విస్తృత చర్చకు దారితీసింది. కాగా సంగీత ఇప్పటికే చెంగల్పట్టు కోర్టులో విడాకుల పిటిషన్ దాఖలు చేసి వివాహ బంధాన్ని రద్దు చేయాలని కోరారు. విడాకుల పిటిషన్తో పాటు దాంపత్య గృహంలో నివసించే హక్కు, శాశ్వత భరణం కూడా ఆమె కోరారు.
విజయ్ న్యాయవాది ద్వారా సంకేతాలు..
తాజా పిటిషన్లో సంగీత తరఫు న్యాయవాది తెలిపిన ప్రకారం విజయ్ వృత్తి, రాజకీయ పరిస్థితులను దృష్టిలో ఉంచుకొని పరస్పర సమ్మతితో గౌరవప్రదంగా విడిపోవడానికి పలుమార్లు ప్రయత్నాలు చేసినట్లు పేర్కొన్నారు. అయితే ఆ ప్రయత్నాలు ఫలించలేదని తెలిపారు. ఇంకా పిటిషన్లో పేర్కొన్న మరో అంశం ఏమిటంటే, న్యాయపరంగా విడిపోవడానికి కోర్టును ఆశ్రయిస్తే ఆమెకు దాంపత్య గృహంలో నివసించేందుకు అనుమతి ఇవ్వబోమని ప్రత్యర్థి తరఫు న్యాయవాది ద్వారా సంకేతాలు ఇచ్చినట్లు ఆరోపించారు. సంగీత తన పిటిషన్లో తాను బ్రిటిష్ పౌరురాలు కావడంతో ప్రస్తుతం కుటుంబ స్థాయికి తగిన ఇతర నివాసం తన వద్ద లేదని పేర్కొన్నారు. అందువల్ల విడాకుల కేసు తుది నిర్ణయం వచ్చే వరకు దాంపత్య గృహంలోనే నివసించేందుకు అనుమతి ఇవ్వాలని లేదా విజయ్ సమాన స్థాయి కలిగిన ప్రత్యామ్నాయ నివాసాన్ని కల్పించాలని కోర్టును కోరారు.
కాగా ఈ పిటిషన్పై టీవీకే అధినేత విజయ్ ఇప్పటివరకు స్పందించలేదు. మరోవైపు 2026 ఎన్నికలను దృష్టిలో ఉంచుకొని అంతర్జాతీయ మహిళా దినోత్సవం సందర్భంగా మహిళలకు సంబంధించిన పలు హామీలను ప్రకటించేందుకు ఆయన సిద్ధమవుతున్నారు.
