తాను సినిమాల్లో నటించిన సమయంలో తన దుస్తులను తానే డిజైన్ చేసుకుని ధరించే దాన్నని నటి రేణు దేశాయ్ తెలిపారు. తన తొలి సినిమా బద్రి మూవీ విశేషాలను ఆమె తాజాగా పంచుకున్నారు. ఆ సినిమాలో తన పాత్రకు సంబంధించిన దుస్తులను తానే డిజైన్ చేస్తానని దర్శకుడు పూరీ జగన్నాథ్కు చెప్పానని, అందుకు ఆయన కూడా ఓకే చెప్పారని తెలిపారు. తాను నటించిన యాడ్స్ వల్లనే ఆ మూవీలో ఆఫర్ వచ్చిందని వెల్లడించారు. తాను ఏ విషయంలో అయినా సరే సూటిగా మాట్లాడతానని, సినీ పరిశ్రమకు అది సెట్ కాదని, అందుకే మొదట్లో సినిమాల్లో నటించకూడదని నిర్ణయించుకున్నానని, కానీ తరువాత తన నిర్ణయం మార్చుకున్నానని తెలిపారు. ఇక బద్రి తరువాత తమిళంలో జేమ్స్ పాండు అనే సినిమాలో ఆఫర్ వచ్చిందని, ప్రభుదేవా మూవీ కావడంతో అందులో నటించేందుకు అడిగితే ఫోన్లోనే తన అంగీకారం తెలిపినట్లు వివరించారు. జానీ సిపిమాకు తాను ప్రొడక్షన్ డిజైనర్ గా పనిచేశానని వెల్లడించారు. ఎవరూ సెలెక్ట్ అవకపోవడంతో ఆఖరి క్షణంలో తాను హీరోయిన్ గా ఎంపికైనట్లు తెలిపారు.
రైతుల సమస్యలపై త్వరలోనే సినిమా..
కాగా రేణు దేశాయ్ ఇష్క్ వాలా లవ్ అనే సినిమాకు దర్శకత్వం వహించారు. రైతుల జీవితాలు, వారి సమస్యలపై త్వరలోనే ఓ సినిమా చేయనున్నట్లు తెలిపారు. త్వరలోనే ఈ సినిమా షూటింగ్ను ప్రారంభించనున్నారు. 16 రోజుల పండుగ సినిమాతోపాటు మరో తెలుగు సినిమాలో, ఓ షార్ట్ఫిలింలో రేణు దేశాయ్ నటిస్తున్నారు. జానీ తరువాత 20 ఏళ్లకు టైగర్ నాగేశ్వర్ రావు సినిమాలో కీలకపాత్రలో ఆమె నటించారు. రవితేజ హీరోగా వచ్చిన ఈ సినిమా 2023లో విడుదలై బాక్సాఫీస్ వద్ద డిజాస్టర్గా నిలిచింది. అయితే డాక్టర్ కావాలన్నది తన కల అని, కానీ అనుకోకుండా సినిమాల్లోకి వచ్చానని ఆమె తెలిపారు.
ట్రోల్స్ను ఎదుర్కొన్న నటి..
ఇక రేణు దేశాయ్ సామాజిక మాధ్యమాల్లో ఎక్కువ యాక్టివ్గా ఉంటారు. సమాజంలో జరుగుతున్న సంఘటనలపై ఆమె స్పందిస్తుంటారు. ఇటీవల వీధి కుక్కల పట్ల సుప్రీం కోర్టు ఇచ్చిన తీర్పు నేపథ్యంలో ఆమె జంతు ప్రేమికులతో కలిసి గళమెత్తారు. వీధి కుక్కలను చంపకూడదని, వాటిని సంరక్షించాలని అన్నారు. అయితే ఈ విషయంపై ఆమె తీవ్రమైన నెగెటివిటీని ఎదుర్కొన్నారు. సోషల్ మీడియాలో ఆమెను చాలా మంది ట్రోల్ చేశారు. దీంతో ఆమె ఓ దశలో కన్నీటి పర్యంతమయ్యారు. తాను వీధి కుక్కలను కాపాడాలని మాట్లాడానని, తన గురించి ఎవరైనా తప్పుగా మాట్లాడినా, ట్రోల్ చేసినా సహించేది లేదని చెప్పారు. ఆ తరువాత ఆమె ఇచ్చిన ఫిర్యాదు మేరకు పోలీసులు పలువురిని అరెస్టు కూడా చేశారు.
