Nidhhi Agerwal : బాలకృష్ణ సినిమా వస్తుందంటే చాలు.. అభిమానులకు పండగే అని చెప్పవచ్చు. ఆయన సినిమాలకు థియేటర్లలో బాక్సులు దద్దరిల్లిపోతాయి. అంతలా ఆయన సినిమాల ప్రభావం ఉంటుంది. ఇక ఈయన ఈమధ్యే అఖండ సినిమాతో ప్రేక్షకులను పలకరించారు. చాలా రోజుల తరువాత బాలయ్య మళ్లీ ఈ చిత్రం ద్వారా హిట్ కొట్టి జోరు మీదున్నారు. కరోనా ప్రభావం ఉన్నప్పటికీ అఖండ వసూళ్లలో సునామీని సృష్టించింది. ఈ క్రమంలోనే అఖండ జోష్తో బాలయ్య వరుస సినిమాలు చేస్తున్నారు. ప్రస్తుతం ఆయన గోపీచంద్ మలినేని దర్శకత్వంలో శృతి హాసన్తో కలిసి సినిమా చేస్తున్నారు. అయితే ఈ మూవీ అనంతరం ఆయన అనిల్ రావిపూడితో మూవీ చేయనున్నారు.
ఇక అనిల్ రావిపూడి సినిమాలో బాలయ్య కుమార్తెగా శ్రీలీల నటించనుంది. అయితే బాలయ్యకు ఇందులో హీరోయిన్గా ముందుగా పలువురి పేర్లు వినిపించాయి. వారిలో ప్రియమణి పేరు ఒకటి. కానీ ఆమెకు కాల్ షీట్స్ అడ్జస్ట్ కావడం లేదని సమాచారం. దీంతో ఆమెకు బదులుగా ఈ మూవీలో నిధి అగర్వాల్ను తీసుకుంటారని తెలుస్తోంది. అదే జరిగితే నిధి అగర్వాల్ నక్క తోక తొక్కిందనే చెప్పవచ్చు. ఎందుకంటే ఆమె ఇప్పటి వరకు చేసింది చిన్న హీరోలతోనే. అగ్ర హీరోలతో నటించలేదు. పవన్ కల్యాణ్తో కలిసి హరిహర వీరమల్లు చిత్రంలో నటిస్తోంది. కానీ ఈ మూవీ షూటింగ్ అర్థాంతరంగా ఆగిపోయింది. ఇక ఈ సినిమా మళ్లీ ఎప్పుడు మొదలవుతుందో.. ఎప్పుడు రిలీజ్ అవుతుందో తెలియదు. మరోవైపు వేరే సినిమాలకు కూడా ఈమె ఓకే చెప్పలేదు. కనుక బాలయ్య లాంటి అగ్రహీరో సినిమాలో హీరోయిన్గా ఆఫర్ వస్తే కాదనలేదు కదా. కాబట్టి ఈమె ఈ మూవీకి ఓకే చెప్పిందనే తెలుస్తోంది. కానీ దీనిపై అధికారికంగా ఎలాంటి వివరాలను వెల్లడించలేదు. త్వరలో వెల్లడించే అవకాశం ఉంది.
ఇక నిధి అగర్వాల్ చివరిసారిగా అశోక్ గల్లాతో కలిసి హీరో అనే మూవీలో నటించింది. అయితే ఈ మూవీ బాక్సాఫీస్ వద్ద ఘోర పరాజయం పాలైంది. ఆ తరువాత ఈమె మూవీలు ఏమీ రిలీజ్ కాలేదు. అయితే బాలయ్యతో సినిమా చేస్తే అది ఈమెకు కాస్త బూస్టింగ్ ఇస్తుందని చెప్పవచ్చు. దీంతో ఈమెకు మళ్లీ ఆఫర్లు వచ్చేందుకు అవకాశం ఉంటుంది. ఇక బాలయ్య సినిమాలో ఈమె నటించే విషయమై అధికారికంగా వివరాలను వెల్లడించాల్సి ఉంది.
