Nayanthara : లేడీ సూపర్ స్టార్ నయనతార, ఆమె బాయ్ ఫ్రెండ్, దర్శకుడు విగ్నేష్ శివన్ గత కొంత కాలంగా పీకల్లోతు ప్రేమలో మునిగిపోయిన సంగతి తెలిసిందే. వీరు పలు సందర్భాల్లో ఒకరికొకరు ఐ లవ్ యూ చెప్పుకోవడమే కాక.. చెట్టాపట్టాలు వేసుకుని తిరుగుతున్నారు కూడా. వీరు గత 4 ఏళ్లుగా సహజీవనం కూడా చేస్తున్నారు. అయితే వీరిద్దరూ ఇప్పటికే ఎన్నో ఆలయాలు తిరిగారు. ఒక ఆలయంలో అయితే నయనతార నుదుటిపై సింధూరం పెట్టుకుని కనిపించింది. సాధారణంగా హిందూ సంప్రదాయంలో పెళ్లయిన స్త్రీలు మాత్రమే అలా నుదుటిపై సింధూరం ధరిస్తారు. దీంతో అందరిలోనూ అనుమానాలు బలపడ్డాయి. వీరిద్దరూ ఇప్పటికే వివాహం చేసుకుని ఉంటారని.. కానీ అది బయటకు తెలియకుండా జాగ్రత్త పడుతున్నారని.. ఏదో గ్రహ దోషం ఉండడం వల్లే ఇలా చేస్తున్నారని అందరూ అనుకున్నారు. అయితే వారిద్దరికీ ఇదివరకే వివాహం అయిందన్న విషయం అబద్ధమని తెలుస్తోంది. ఎందుకంటే వీరిద్దరూ త్వరలో పెళ్లి చేసుకోబోతున్నారు మరి.
నయనతార, విగ్నేష్ శివన్లు తమ ప్రేమ బంధానికి స్వస్తి చెప్పి త్వరలో పెళ్లి బంధంతో ఒక్కటవనున్నారని తెలుస్తోంది. వీరు జూన్ 9న పెళ్లి చేసుకోనున్నారని సమాచారం. ఓ తమిళ మీడియా సంస్థ ప్రచురించిన కథనం ప్రకారం.. వీరు ఆ తేదీన తిరుమలలో వివాహం చేసుకోనున్నారని తెలుస్తోంది. కేవలం కొద్ది మంది స్నేహితులు, కుటుంబ సభ్యుల నడుమ వీరి వివాహం జరగనుందని సమాచారం. అయితే వివాహం అయ్యాక రిసెప్షన్ను మాత్రం చాలా గ్రాండ్గా ఏర్పాటు చేయనున్నారని టాక్ వినిపిస్తోంది. ఏకంగా మాల్దీవ్స్లో వీరు తమ రిసెప్షన్ను ఏర్పాటు చేస్తారని తెలుస్తోంది. దానికి ఆయా భాషలకు చెందిన పలువురు సినీ ప్రముఖులకు వీరు ఆహ్వానాలు పంపించనున్నారని సమాచారం. ఈ క్రమంలోనే నయనతార, విగ్నేష్ శివన్ల పెళ్లికి సంబంధించిన వార్త సోషల్ మీడియాలో వైరల్ అవుతోంది.
కాగా ఈ ఇద్దరూ గతంలో అనేక ఆలయాలకు తిరిగారు. అనేక సార్లు పూజలు చేశారు. నయనతార జాతకంలో దోషం ఉందని.. కనుకనే ఇన్ని రోజులపాటు పూజలు చేసినట్లు తెలుస్తోంది. కాబట్టే ఇప్పటి వరకు వారు పెళ్లి చేసుకోకుండా ఉన్నారని.. ఇక సరైన సమయం వచ్చింది కనుకనే పెళ్లి చేసుకోవాలని అనుకున్నట్లు తెలుస్తోంది. దీంతో ఎట్టకేలకు ఈ జంట ఒక్కటి కానుంది. అయితే ప్రస్తుతానికి ఇది వైరల్ అవుతున్న సమాచారమే. దీనిపై వారు ఇంకా ఎలాంటి ప్రకటన చేయలేదు. త్వరలో ఏమైనా చెబుతారో.. లేదో.. చూడాలి.
