Karthikeya 2 : ప్ర‌స్తుతం ఎక్క‌డ చూసిన కార్తికేయ 2 మానియానే క‌నిపిస్తుంది. ఎన్నో వాయిదాల త‌ర్వాత విడుదలైన ఈ చిత్రం మొద‌టి షో నుండి పాజిటివ్ టాక్ తెచ్చుకుని బాక్సాఫీస్ వద్ద దూసుకుపోయింది. తొలిరోజు లిమిటెడ్ స్క్రీన్‌ల‌లో విడుదలైన ఈ చిత్రం రెండో రోజుకు స్క్రీన్ కౌంట్ రెట్టింపైంది. ఇక ఫ‌స్ట్‌డేకు మించిన క‌లెక్ష‌న్‌ ల‌ను సెకండ్ డే సాధించి.. కంటెంట్ ఉంటే క‌లెక్ష‌న్ల‌కు తిరుగుండదని మరోసారి నిరూపించింది. కేవ‌లం టాలీవుడ్‌లోనే కాకుండా విడుదలైన అన్ని భాష‌ల్లోనూ ఈ మూవీ మంచి వసూళ్ళ‌ను సాధించింది.
ముఖ్యంగా బాలీవుడ్‌లో రోజు రోజుకూ కార్తికేయ 2పై క్రేజ్ పెరిగిపోయింది. కార్తికేయ 2 చిత్రం బాలీవుడ్‌లో మొద‌టి రోజు కేవ‌లం 60 స్క్రీన్‌ల‌లో విడుద‌లైంది. ఇక రెండో రోజు ఏకంగా 300 స్క్రీన్లు పెరిగాయి. దీనికి పోటీగా అమీర్‌ఖాన్ లాల్ సింగ్ చ‌డ్డా, అక్ష‌య్ కుమార్ ర‌క్షా బంధ‌న్ వంటి సినిమాలున్నా బాలీవుడ్ ప్రేక్షకులు కార్తికేయ 2 చిత్రం వైపే మొగ్గు చూపారు. ఊహించని స్థాయిలో ఏకంగా రూ.120 కోట్ల కలెక్ష‌న్లతో దుమ్మురేపింది. ఈ చిత్రంతో యంగ్ హీరో నిఖిల్‌కు బాలీవుడ్ లో మంచి గుర్తింపు వచ్చింది. థియేటర్లలో సందడి చేసి.. తాజాగా ఓటీటీని పలకరించింది.
థియేటర్లలో ఎగబడి చూసినా.. ఓటీటీలోనూ తన హవా కొనసాగించింది కార్తికేయ 2. దసరా సందర్భంగా జీ5 ఓటీటీ ప్లాట్‌ఫామ్‌లో విడుదలైన ఈ సినిమా సరికొత్త రికార్డుల‌ను సృష్టించింది. ఓటీటీలో విడుదలైన 48 గంటల్లోనే ఏకంగా 100 కోట్ల స్ట్రీమింగ్ మినిట్స్‌తో చరిత్ర సృష్టించింది. ఈ విషయాన్ని జీ5 స్వయంగా తన సోషల్‌ మీడియా అకౌంట్‌ ద్వారా వెల్లడించింది. కృష్ణతత్త్వం నేపథ్యంలో తెరకెక్కిన కార్తికేయ 2 తెలుగు కంటే హిందీ ప్రేక్షకులను విపరీతంగా ఆకట్టుకుంది. ఈ సినిమాలో అనుపమ పరమేశ్వరన్, అనుపమ్ ఖేర్, శ్రీనివాస రెడ్డి కీలకపాత్రల్లో నటించి మెప్పించారు.
