Anda Keema Curry : కోడిగుడ్లు అంటే స‌హ‌జంగానే చాలా మందికి ఇష్టంగా ఉంటుంది. కోడిగుడ్ల‌ను అనేక ర‌కాలుగా వండుకుని తింటుంటారు. కోడిగుడ్ల వేపుడు, బాయిల్డ్ ఎగ్స్‌, కోడిగుడ్డు ఆమ్లెట్‌, కోడిగుడ్డు ట‌మాటా.. ఇలా చాలా ర‌కాలుగా కోడిగుడ్ల‌ను చేయ‌వ‌చ్చు. అయితే కోడిగుడ్ల‌తో ఎంతో రుచిక‌ర‌మైన అండా కీమా కర్రీని కూడా చేయ‌వ‌చ్చు. ఇది అద్భుతంగా ఉంటుంది. చ‌పాతీల‌తో తింటే వ‌హ్వా అంటారు. దీన్ని త‌యారు చేయ‌డం కూడా సుల‌భమే. వంట‌రాని వారు కూడా దీన్ని ఈజీగా చేయ‌వ‌చ్చు. ఈ క్ర‌మంలోనే అండా కీమా కర్రీని ఎలా చేయాలో ఇప్పుడు తెలుసుకుందాం.
అండా కీమా క‌ర్రీ త‌యారీకి కావ‌ల్సిన ప‌దార్థాలు..
ఉడికించిన గుడ్లు – 3, గుడ్లు – 2, ఉల్లిపాయ – 1, ట‌మాటాలు – 2, కొత్తిమీర – 1 క‌ట్ట, ప‌చ్చిమిర్చి – 2, అల్లం వెల్లుల్లి ముద్ద – 1 టేబుల్ స్పూన్‌, జీల‌క‌ర్ర – 1 టీస్పూన్‌, ప‌సుపు – పావు టీస్పూన్‌, కారం – 2 టీస్పూన్లు, ధ‌నియాల పొడి – 1 టీస్పూన్‌, పావ్ భాజీ మ‌సాలా – 1 టీస్పూన్‌, చాట్ మ‌సాలా – 1 టీస్పూన్‌, ఉప్పు – త‌గినంత, నూనె – 3 టేబుల్ స్పూన్లు.
అండా కీమా కర్రీని త‌యారు చేసే విధానం..
స్ట‌వ్ మీద క‌డాయి పెట్టి నూనె వేసి జీల‌క‌ర్ర వేయించి త‌రువాత ప‌చ్చిమిర్చి, ఉల్లిపాయ త‌రుగు వేయాలి. అవి వేగాయ‌నుకున్న త‌రువాత అల్లం వెల్లుల్లి ముద్ద, కొత్తిమీర, ట‌మాటా ముక్క‌లు, త‌గినంత ఉప్పు వేయాలి. త‌రువాత ప‌సుపు, కారం, ధ‌నియాల పొడి, పావ్ భాజీ మ‌సాలా, చాట్ మ‌సాలా వేసి క‌లిపి పావు క‌ప్పు నీళ్లు పోయాలి. ఇది కూర‌లా త‌యారై నూనె పైకి తేలాక ఉడికించిన గుడ్ల‌ను చేత్తో మెదిపి అందులో వేసి స్ట‌వ్ ని సిమ్‌లో పెట్టాలి. ఇప్పుడు మిగిలిన రెండు గుడ్ల సొన‌ను గిల‌కొట్టి కూర‌లో వేసి బాగా క‌లిపి 5 నిమిషాలు అయ్యాక దింపేయాలి. దీంతో ఎంతో రుచిక‌ర‌మైన అండా కీమా క‌ర్రీ రెడీ అవుతుంది. దీన్ని అన్నం లేదా చ‌పాతీలు దేంతో తిన్నా స‌రే ఎంతో రుచిగా ఉంటుంది. ఎప్పుడూ చేసే కోడిగుడ్ల కూర‌ల‌కు బ‌దులుగా ఈసారి ఇలా ట్రై చేయండి. అంద‌రూ ఇష్టంగా తింటారు.
