మెగాస్టార్ చిరంజీవి తన భార్య సురేఖకు హృదయపూర్వక జన్మదిన శుభాకాంక్షలు తెలియజేశారు. ఎక్స్ వేదికగా ఆయన చేసిన ఈ పోస్ట్ సాధారణ పుట్టినరోజు సందేశం కాకుండా, 46 ఏళ్ల దాంపత్య బంధానికి అద్దం పట్టే భావోద్వేగ పోస్టుగా నిలిచింది. నా ప్రశాంతత, నా సహాయక వ్యవస్థ, మా కుటుంబానికి యాంకర్.. అంటూ సురేఖను చిరంజీవి అభివర్ణించారు. తన తల్లిదండ్రులు, సోదరులను సైతం తనవారిలా చూసుకుంటూ, కోడలిగా కాకుండా కూతురిగా వారి మనసుల్లో స్థానం సంపాదించుకున్నారని గుర్తు చేసుకున్నారు.
కృతజ్ఞతాభావం వ్యక్తం చేసిన మెగాస్టార్..
తన విజయాలను ప్రపంచం ప్రతిభకు, కృషికి ఆపాదించినా, వాస్తవానికి ఆ వెలుగుల వెనుక నిలిచిన అసలైన శక్తి సురేఖేనని చిరంజీవి స్పష్టం చేశారు. కుటుంబ బాధ్యతలన్నింటినీ తన భుజాలపై మోసుకుంటూ, తాను వెండితెరపై మెరగడానికి మార్గం సుగమం చేశారని కృతజ్ఞతాభావం వ్యక్తం చేశారు.
సురేఖ పుట్టినరోజు, తమ వివాహ వార్షికోత్సవానికి సమీపంగా రావడం వల్ల ఈ సందేశం మరింత భావోద్వేగంగా మారింది. ప్రేమ, గౌరవం, జీవితాంత కృతజ్ఞతల పునరుద్ఘాటనగా ఈ పోస్ట్ అభిమానులను ఆకట్టుకుంటోంది. ఈ సందేశంతో మరోసారి చిరంజీవి ఒక విషయాన్ని స్పష్టంగా చాటారు. ప్రతి గొప్ప విజయం వెనుక ఓ నిశ్శబ్ద ప్రేరణ ఉంటుంది. తన జీవితంలో ఆ ప్రేరణ సురేఖేనని ఆయన అభిమానులకు గుర్తుచేశారు.
