స్మార్ట్ఫోన్ మార్కెట్లో తన హైఎండ్ పోర్ట్ఫోలియోను మరింత బలోపేతం చేస్తూ వివో (Vivo) తాజాగా వివో X200Tని భారత మార్కెట్లో అధికారికంగా విడుదల చేసింది. జైస్ (Zeiss) టెక్నాలజీతో రూపొందించిన శక్తివంతమైన కెమెరా వ్యవస్థ, మీడియాటెక్ ఫ్లాగ్షిప్ ప్రాసెసర్తో ఈ ఫోన్ తన ధర శ్రేణిలో అత్యంత శక్తివంతమైన పరికరాల్లో ఒకటిగా నిలుస్తోంది. డిజైన్ విషయంలో వివో ఈసారి మినిమలిస్ట్ దృష్టికోణాన్ని అవలంబించింది. వెనుక భాగంలో శుభ్రంగా కనిపించే బ్యాక్ ప్యానెల్, పెద్ద వృత్తాకార కెమెరా మాడ్యూల్ ఆకర్షణగా నిలుస్తాయి. పవర్ బటన్, వాల్యూమ్ బటన్లు ఎడమ వైపు అమర్చగా, కింద భాగంలో టైప్-సి పోర్ట్, సిమ్ ట్రే, స్పీకర్ గ్రిల్ ఏర్పాటు చేశారు.
భారత్లో ధర, లభ్యత..
- వివో X200T రెండు వేరియంట్లలో అందుబాటులోకి వచ్చింది.
- 12GB ర్యామ్, 256GB స్టోరేజ్ మోడల్ ధర రూ. 59,999గా ఉంది.
- 12GB ర్యామ్ , 512GB స్టోరేజ్ వేరియంట్ ధర రూ. 69,999గా ఉంది.
ప్రారంభ ఆఫర్గా వినియోగదారులకు రూ. 5,000 వరకు ఇన్స్టంట్ క్యాష్బ్యాక్ కూడా అందిస్తున్నారు. ఈ ఫోన్ స్టెల్లర్ బ్లాక్, సీసైడ్ లైలాక్ అనే రెండు రంగుల్లో లభించనుంది. విక్రయాలు ఫ్లిప్కార్ట్, వివో ఇండియా ఈ-స్టోర్తో పాటు సంస్థ అధికారిక రిటైల్ భాగస్వాముల ద్వారా ప్రారంభం కానున్నాయి.
స్పెసిఫికేషన్లు, ఫీచర్లు..
వివో X200Tలో 6.67 అంగుళాల AMOLED డిస్ప్లే ఉంది. ఇది 120Hz రిఫ్రెష్ రేట్తో పాటు గరిష్టంగా 5000 నిట్స్ పీక్ బ్రైట్నెస్ను అందిస్తుంది. ఫోన్లో మీడియాటెక్ డైమెన్సిటీ 9400 ప్లస్ ప్రాసెసర్ను ఉపయోగించారు. దీనికి LPDDR5X అల్ట్రా ర్యామ్, UFS 4.1 స్టోరేజ్ మద్దతు ఉంది. ఈ డివైస్ ఆండ్రాయిడ్ 16 ఆధారిత Origin OS 6తో రన్ అవుతుంది. వినియోగదారులకు ఐదేళ్ల పాటు ఆపరేటింగ్ సిస్టమ్ అప్డేట్లు, ఏడేళ్ల వరకు సెక్యూరిటీ అప్డేట్లు అందిస్తామని వివో హామీ ఇచ్చింది.
కెమెరా, బ్యాటరీ..
ఫోటోగ్రఫీ విషయంలో ఈ ఫోన్ ప్రత్యేకంగా ఆకట్టుకుంటోంది. జైస్ సహకారంతో రూపొందించిన ట్రిపుల్ రియర్ కెమెరా సెటప్లో 50 మెగాపిక్సెల్ ప్రైమరీ కెమెరా (OIS సపోర్ట్తో), 50 మెగాపిక్సెల్ అల్ట్రా వైడ్ లెన్స్, 50 మెగాపిక్సెల్ పెరిస్కోప్ టెలిఫోటో లెన్స్ ఉన్నాయి. సెల్ఫీలు, వీడియో కాల్స్ కోసం ముందు భాగంలో 32 మెగాపిక్సెల్ కెమెరాను అమర్చారు. బ్యాటరీ పరంగా, 6200mAh భారీ బ్యాటరీతో పాటు 90W వైర్డ్ ఫాస్ట్ ఛార్జింగ్, 40W వైర్లెస్ ఛార్జింగ్ సపోర్ట్ను అందిస్తోంది. అదనంగా, ఈ ఫోన్కు IP68, IP69 రేటింగ్ ఉండటం వల్ల నీరు, ధూళి నుంచి మెరుగైన రక్షణ లభిస్తుంది.
ఫ్లాగ్షిప్ స్థాయి ఫీచర్లు, బలమైన కెమెరా వ్యవస్థ, దీర్ఘకాల సాఫ్ట్వేర్ అప్డేట్ల హామీతో వివో X200T ప్రీమియం సెగ్మెంట్లో గట్టి పోటీ ఇచ్చే మోడల్గా నిలవనుందని టెక్ విశ్లేషకులు భావిస్తున్నారు.
