ట్విట్టర్ యూజర్లకు ఇది ఒక శుభవార్త అని చెప్పవచ్చు. సోషల్ మీడియాలో దిగ్గజ సంస్థ అయిన ట్విట్టర్ తమ యూజర్లకు శుభవార్తను తెలిపింది. ఇకపై ట్విట్టర్ వాడే ప్రతి ఒక్కరూ ఈ సరికొత్త ఫీచర్ ద్వారా నెల నెలా డబ్బులు సంపాదించవచ్చు. ట్విట్టర్ సూపర్ ఫాలోస్ అనే సరికొత్త ఫీచర్ ను అందుబాటులోకి తీసుకు రావడంతో యూజర్లు ఈ ఫీచర్ ద్వారా నెల నెలా ఆదాయం పొందవచ్చు.
ట్విట్టర్ వాడే యూజర్లు కంటెంట్ షేరింగ్ చేస్తూ డబ్బును సంపాదించవచ్చు. సాధారణ యూజర్లు, జర్నలిస్టులు, క్రీడాకారులు, స్కిన్ కేర్ బ్యూటీ ఎక్స్పర్ట్స్, జ్యోతిష్య ప్రియులు, సంగీత కళాకారులు, క్రీడా నిపుణులు మొదలైనవారు ఈ సరికొత్త ఫీచర్ ద్వారా కంటెంట్ ను క్రియేట్ చేసి ట్విట్టర్ ద్వారా షేర్ చేస్తే డబ్బులు సంపాదించవచ్చని తెలిపింది. ప్రస్తుతం ఈ ఫీచర్ కేవలం అమెరికా, కెనడాలో కొంతమందికి మాత్రమే అందుబాటులో ఉంది. త్వరలోనే ఇతర దేశాల్లోని యూజర్లకు కూడా ఈ ఫీచర్ ను అందుబాటులోకి తీసుకురానున్నట్లు ట్విట్టర్ ప్రతినిధులు పేర్కొన్నారు.
ఈ ఫీచర్ కోసం అప్లై చేయాలంటే కొన్ని అర్హతలను కూడా కలిగి ఉండాలి. 18 సంవత్సరాలు పైబడిన వారు మాత్రమే ఈ ఫీచర్ కోసం అప్లై చేయాలి. అదేవిధంగా ట్విట్టర్లో కనీసం పదివేల మంది ఫాలోవర్స్ ను కలిగి ఉండాలి. నెలకు కనీసం 25 సార్లు ట్విట్టర్ ద్వారా ట్వీట్ చేస్తూ ఉండాలి. ఈ ఫీచర్ ద్వారా యూజర్లు 2.99, 4.99, 9.99 డాలర్లతో ప్రతి నెలా సబ్స్క్రిప్షన్ చేసుకోవాల్సి ఉంటుంది.
