గూగుల్ తన కొత్త మిడ్ రేంజ్ స్మార్ట్ఫోన్ గూగుల్ పిక్సెల్ 10ఎ విడుదల తేదీని అధికారికంగా ప్రకటించింది. పిక్సెల్ 10 సిరీస్లో భాగంగా తక్కువ ధరలో అందుబాటులోకి రానున్న ఈ మోడల్ ద్వారా భారత మార్కెట్లో తన ప్రాధాన్యతను మరింత విస్తరించాలనే లక్ష్యంతో గూగుల్ అడుగులు వేస్తోంది. 2026 మొదటి త్రైమాసికంలోనే ఈ ఫోన్ విడుదల కానుండటం విశేషం. గూగుల్ పిక్సెల్ 10ఎ ఫిబ్రవరి 18వ తేదీ, 2026న భారతదేశంతో పాటు ప్రపంచవ్యాప్తంగా విడుదల కానుంది. విడుదల అనంతరం ఈ ఫోన్ ఫ్లిప్కార్ట్, గూగుల్ అధికారిక స్టోర్ ద్వారా విక్రయానికి రానుంది. ధర విషయానికొస్తే, కంపెనీ ఇంకా స్పష్టత ఇవ్వకపోయినా, భారత మార్కెట్లో రూ.50వేల లోపే ధర ఉండొచ్చని అంచనాలు వినిపిస్తున్నాయి.
ఫీచర్లు ఇవేనా..?
ఇదే సమయంలో, ముందస్తు ఆఫర్లను కూడా గూగుల్ ప్రకటించింది. ఫిబ్రవరి 13, మధ్యాహ్నం 1:29 గంటలలోపు గూగుల్ స్టోర్ మెయిలింగ్ లిస్ట్కు సభ్యత్వం తీసుకున్న వారికి ప్రత్యేక కొనుగోలు ప్రయోజనాలు లభించనున్నాయి. ఈ ఆఫర్ల వివరాలను ఫిబ్రవరి 18న ప్రీ-ఆర్డర్లు ప్రారంభమైన రోజే ఈ-మెయిల్ ద్వారా పంపనున్నట్లు గూగుల్ తెలిపింది. కొనుగోలు సమయంలో వీటిని నేరుగా వర్తింపజేసుకోవచ్చు. సాంకేతికంగా పిక్సెల్ 10ఎ లో టెన్సర్ జి4 ప్రాసెసర్ ఉండే అవకాశం ఉంది. ఇదే చిప్ గతంలో పిక్సెల్ 9ఎ లోనూ ఉపయోగించారు. భద్రత కోసం టైటన్ ఎం2 చిప్, 8జీబీ ఎల్పీడీడీఆర్ 5ఎక్స్ ర్యామ్, 128 జీబీ, 256జీబీ స్టోరేజ్ వేరియంట్లు ఉండవచ్చని సమాచారం. ఫోన్ ఆండ్రాయిడ్ 16తోనే లభించే అవకాశం ఉంది. 7 సంవత్సరాల పాటు ఆపరేటింగ్ సిస్టమ్, సెక్యూరిటీ, ఫీచర్ అప్డేట్స్ ఇవ్వాలని గూగుల్ యోచిస్తున్నట్లు తెలుస్తోంది.
కెమెరా, బ్యాటరీ, ఇతర సదుపాయాలు..
ఫోటోగ్రఫీ పరంగా ఈ ఫోన్లో 48 మెగాపిక్సెల్ ప్రధాన కెమెరా, ఆప్టికల్ ఇమేజ్ స్టెబిలైజేషన్తో పాటు ఎల్ఈడీ ఫ్లాష్ ఉండే అవకాశం ఉంది. 13 మెగాపిక్సెల్ అల్ట్రా వైడ్ కెమెరా, అలాగే 13 మెగాపిక్సెల్ ఫ్రంట్ కెమెరా ఉండొచ్చని నివేదికలు చెబుతున్నాయి. వెనుక కెమెరాతో 4కే వీడియోలను 60 ఫ్రేముల వేగంతో, ముందు కెమెరాతో 4కే వీడియోలను 30 ఫ్రేముల వేగంతో రికార్డ్ చేయవచ్చని అంచనా వేస్తున్నారు. ఇంకా ఫోన్లో ఇన్-డిస్ప్లే ఫింగర్ప్రింట్ సెన్సర్, ఐపీ 68 వాటర్ అండ్ డస్ట్ రెసిస్టెన్స్, స్టీరియో స్పీకర్లు, డ్యూయల్ మైక్రోఫోన్లు ఉండనున్నట్లు తెలుస్తోంది. కనెక్టివిటీకి 5జి, 4జి వీవోఎల్టీఈ, వైఫై 6ఈ, బ్లూటూత్ 6, నావిక్ సహా పలు శాటిలైట్ నావిగేషన్ వ్యవస్థలు ఉంటాయని సమాచారం. 5100 ఎంఏహెచ్ బ్యాటరీతో పాటు ఫాస్ట్ వైర్డ్ చార్జింగ్, వైర్లెస్ చార్జింగ్ సపోర్ట్ కూడా ఉండే అవకాశం ఉంది.
అయితే గూగుల్ పిక్సెల్ 10ఎ ను మిడ్ రేంజ్ వినియోగదారులను లక్ష్యంగా చేసుకుని, ఫీచర్లు-ధర మధ్య సమతుల్యతతో మార్కెట్లోకి తెచ్చేందుకు ప్రయత్నిస్తున్నారని అర్థమవుతోంది. ఇక ఈ ఫోన్ వినియోగదారులను ఏ మేర ఆకర్షిస్తుందో చూడాలి.
