వాంఖడే పిచ్‌పై బీసీసీఐకి టీమిండియా ఫిర్యాదు..? అమెరికాతో మ్యాచ్ తర్వాత అసంతృప్తి..?

టీ20 వరల్డ్‌కప్ 2026లో ఈసారి అమెరికాతో త‌ల‌ప‌డ్డ భార‌త్ అతిక‌ష్టం మీద గెలిచింది. మ్యాచ్ ఆరంభానికి ముందు కొన్ని రోజుల వ‌ర‌కు పిచ్ బ్యాటింగ్ కు అనుకూలంగా ఉంటుంద‌ని, భార‌త్ 300 స్కోరు సాధించ‌డం ఖాయ‌మ‌ని అంద‌రూ అంచ‌నా వేశారు. కానీ మ్యాచ్‌లో మాత్రం భార‌త్ డిఫెండ‌బుల్ స్కోర్ చేసింది. 20 ఓవ‌ర్ల‌లో 9 వికెట్ల న‌ష్టానికి 161 ప‌రుగులు చేసింది. సూర్య కుమార్ యాద‌వ్‌కు గ‌న‌క లైఫ్ ల‌భించ‌క‌పోయి ఉంటే భార‌త్ ఈ మ్యాచ్ లో ఓట‌మి పాలు అయ్యి ఉండేది. కానీ మ్యాచ్‌లో గెలుపుతో ఫ్యాన్స్ ఊపిరి పీల్చుకున్నారు. అయితే పిచ్ బ్యాటింగ్ కు అనుకూలంగా ఉంటుంద‌ని భావించిన టీమిండియా అనుకున్న ఫ‌లితం రాక‌పోయే స‌రికి ఈ విష‌యంపై బీసీసీకి ఫిర్యాదు చేసిన‌ట్లు తెలిసింది. ఈ మేర‌కు టైమ్స్ ఆఫ్ ఇండియా ఓ క‌థ‌నాన్ని ప్ర‌చురించింది.

యూఎస్ఏ ఆట‌తీరుకు ఆశ్చ‌ర్య‌పోయిన భార‌త్‌..

యూఎస్ఏను భార‌త్ చిత్తుగా ఓడిస్తుంద‌ని అంద‌రూ అంచ‌నా వేశారు. న్యూజిలాండ్‌తో ఇటీవ‌ల‌ జరిగిన సిరీస్‌లో విధ్వంసకర ఆటతో ఆకట్టుకున్న తర్వాత, సూర్యకుమార్ యాదవ్ సారథ్యంలోని భారత్ జ‌ట్టు టైటిల్‌ను నిలబెట్టుకునే తొలి జట్టుగా నిలుస్తుందన్న అభిప్రాయం బలపడింది. అయితే, టోర్నమెంట్ తొలి మ్యాచ్‌లోనే ఆ అంచనాలకు గట్టి ఎదురుదెబ్బ తగిలింది. గత ఆదివారం జరిగిన మ్యాచ్‌లో పెద్దగా గుర్తింపు లేని అమెరికా బౌలింగ్ దళం భారత్‌ను 13 ఓవర్లలోనే 77 పరుగులకు ఆరు వికెట్లు కోల్పోయే స్థితికి నెట్టింది. ఇది భారత క్యాంప్‌ను ఒక్కసారిగా దిగ్భ్రాంతికి గురి చేసింది. 300 పరుగుల మార్క్‌ను దాటగల జట్టుగా ప్రచారం పొందిన భారత్‌కు, వాంఖెడే స్టేడియంలోని పిచ్‌పై అమెరికా బౌలర్లు చూపిన క్రమశిక్షణ ఆశ్చర్యం కలిగించింది. దూకుడు ఆటతోనే మ్యాచ్‌ను తేల్చేస్తుందనుకున్న భారత్ తీవ్ర ఒత్తిడిలో పడింది.

దూకుడు వ్యూహం.. ఇబ్బందుల్లో..

ఈ సమయంలో కెప్టెన్ సూర్యకుమార్ యాదవ్ దూకుడు తగ్గించి, సంప్రదాయ శైలిలో ఆడాలనే నిర్ణయం తీసుకోవడం కీలకంగా మారింది. ఆ నిర్ణయం లేకపోయి ఉంటే, తక్కువ స్థాయి ప్రత్యర్థి చేతిలో భారత్ ఇబ్బందుల్లో పడి ఉండేద‌ని విశ్లేషకులు అంటున్నారు. ముంబైలో గెలుపుతో తప్పించుకున్నప్పటికీ, వాంఖెడే పిచ్ స్వభావంపై భారత జట్టు అసంతృప్తి వ్యక్తం చేసినట్టు టైమ్స్ ఆఫ్ ఇండియా కథనం వెల్లడించింది. ఈ విషయం బీసీసీఐకి కూడా తెలియజేశారని ఆ నివేదిక పేర్కొంది. అయితే ఇలా చేయ‌డం ఇదే తొలిసారి కాదు. భారత్ దూకుడు టీ20 వ్యూహం ఇంతకుముందు కూడా పరీక్షకు గురైంది. సెప్టెంబర్‌లో యూఏఈలో జరిగిన ఆసియా కప్‌లో, అక్టోబర్‌లో ఆస్ట్రేలియాలో కూడా బ్యాటింగ్ యూనిట్ ఇబ్బందులు ఎదుర్కొంది. ఆ సందర్భాల్లో బౌలర్లు జట్టును ఆదుకున్నారు.

300 స్కోరు సాధ్య‌మేనా..?

వరల్డ్‌కప్‌కు ముందు నెలలో మాత్రం భారత్ మళ్లీ పూర్తిగా దూకుడు మార్గాన్ని ఎంచుకుంది. శుబ్‌మన్ గిల్‌ను పక్కన పెట్టి దూకుడు ఆటపై మరింత దృష్టి పెట్టింది. ఈ మార్పు న్యూజిలాండ్ సిరీస్‌లో స్పష్టంగా కనిపించింది. ఆ సిరీస్‌ను భారత్ 4-1తో గెలిచింది. విశాఖపట్నంలో మాత్రమే పిచ్ కారణంగా ఇబ్బంది ఎదురైంది. ఇప్పుడు భారత్ హై-స్కోరింగ్ పిచ్‌లకే ప్రాధాన్యం ఇస్తున్నట్టు స్పష్టమైంది. ఫిబ్రవరి 12న ఢిల్లీలో నమీబియాతో మ్యాచ్ ఆడనున్న భారత్, ఆ తర్వాత కొలంబో వెళ్లి పాకిస్థాన్‌తో కీలక పోరులో తలపడనుంది. అనంతరం అహ్మదాబాద్‌లో నెదర్లాండ్స్‌తో గ్రూప్ దశ చివరి మ్యాచ్ ఆడనుంది. అయితే ఆయా వేదిక‌ల్లో భార‌త బ్యాట‌ర్లు ఎలా ఆడుతారు.. 300 స్కోరు ఈ టోర్నీలో సాధ్య‌మేనా..? అని అభిమానులు ఎంతో ఆస‌క్తిగా ఎదురు చూస్తున్నారు.

గమనిక: ఇది సోషల్ మీడియా, వివిధ మీడియా కథనాల ఆధారంగా సేకరించిన సమాచారం. దీనిపై ఇంకా అధికారిక ప్రకటన వెలువడలేదు. పాఠ‌కులు ఐసీసీ లేదా బీసీసీఐ అధికారిక సైట్ల‌ను ద‌ర్శించి పూర్తి స‌మాచారాన్ని తెలుసుకోవాల్సి ఉంటుంది.