కేవ‌లం రూ. 40 వేలకే ఎలక్ట్రిక్ స్కూటర్..!

పెట్రోల్‌, డీజిల్ వాహ‌నాల వాడ‌కాన్ని త‌గ్గించేందుకు కేంద్రం ఎల‌క్ట్రిక్ వాహ‌నాల‌ను ప్రోత్స‌హిస్తోంది. అందుక‌నే ఎల‌క్ట్రిక్ వాహ‌నాల‌ను కొనుగోలు చేసే వారికి స‌బ్సీడీల‌ను కూడా అందిస్తోంది. అయితే వినియోగ‌దారుల అభిరుచుల‌కు అనుగుణంగా కంపెనీలు ఎల‌క్ట్రిక్ వాహ‌నాల‌ను త‌యారు చేసి అందిస్తున్నాయి. ఈ క్ర‌మంలోనే ఎనర్జీ స్టోరేజీ సొల్యూషన్స్ ప్రొవైడర్ ఓకాయా గ్రూప్ ఎలక్ట్రిక్ టూ వీలర్ రంగంలోకి ప్రవేశిస్తున్నట్లు తెలిపింది.

ఈ సంస్థ ఇప్పటికే హిమాచల్ ప్రదేశ్ లో ద్విచక్ర వాహనాల తయారీ కర్మాగారాన్ని ఏర్పాటు చేసింది. రాజస్థాన్ లోని నీమ్రానా ప్రాంతంలో 2023 – 25 నాటికి ఇంకో ఫ్యాక్టరీని ప్రారంభించనుంది. భారతీయ పరిస్థితులకు అనుగుణంగా ఎలక్ట్రిక్ బైక్ లను తయారు చేస్తామని ఆ సంస్థ తెలిపింది. అవియోనిక్ సిరీస్, క్లాస్ ఐక్యూ సిరీస్ ఎలక్ట్రిక్ స్కూటర్లలో అధునాతమైన టెక్నాలజీని ఉపయోగిస్తామ‌ని ఆ కంపెనీ ప్ర‌తినిధులు తెలిపారు.

కాగా ఈ కంపెనీ విడుద‌ల చేయ‌నున్న ఎల‌క్ట్రిక్ స్కూటర్ ధర రూ.39,999 నుంచి రూ.60,000 వ‌ర‌కు ఉండ‌నుంది. అంటే అత్యంత చ‌వ‌క ధ‌ర‌కు స్కూట‌ర్ల‌ను అందిస్తున్న‌మాట‌. 2025 నాటికి భారతీయ రోడ్లపై 1 కోటి ఇ-స్కూటర్లను తీసుకురావాల‌ని కేంద్ర ప్రభుత్వం క‌స‌ర‌త్తు చేస్తోంది. దానికి తాము ఊతం ఇస్తామ‌ని ఓకాయా తెలిపింది. ఈ మేర‌కు ఓకాయా పవర్ గ్రూప్ మేనేజింగ్ డైరెక్టర్ అనిల్ గుప్తా పై వివ‌రాల‌ను వెల్ల‌డించారు. అయితే స‌ద‌రు స్కూట‌ర్లు ఎప్పుడు అందుబాటులోకి వ‌చ్చేది వెల్ల‌డించ‌లేదు. కానీ అతి త్వ‌ర‌లోనే లాంచ్ చేస్తార‌ని తెలుస్తోంది.