సోషల్ మీడియాలో నటి త్రిష గురించి తరచూ ఏదో ఒక వార్త వస్తూనే ఉంది. ఈ క్రమంలోనే తాజాగా మరో వార్త వైరల్ అవ్వగా అందుకు త్రిష స్పందించింది. త్రిష సినిమాలకు గుడ్ బై చెప్పబోతున్నారని పలు మీడియా కథనాలు వచ్చాయి. అయితే ఆ ప్రచారాన్ని ఆమె ఖండించారు. ఈ మేరకు ఆమె తన ఇన్స్టాగ్రామ్ ఖాతాలో ఓ స్టోరీని పోస్ట్ చేశారు. త్రిష కొత్త ప్రాజెక్టులకు సంతకం చేయడం మానేసిందని మీడియా సంస్థలు కథనాలను ప్రచురించాయి. కానీ అవన్నీ పుకార్లేనని ఆమె స్పష్టం చేశారు. తాను సినిమాలను మానేశానని, ఓ ధనవంతున్ని పెళ్లి చేసుకున్నానని, 2 సంవత్సరాలు పూర్తి చేసుకున్న నలుగురు పిల్లలను పెంచుతున్నానని.. ఏవేవో కథనాలను ప్రచురించారని, అయితే అవన్నీ వట్టి పుకార్లేనని ఆమె కొట్టి పారేశారు. వాటికి ఇంకేమైనా జోడించి ప్రచురించుకుంటే ప్రచురించుకోమని ఆమె ఎద్దేవా చేశారు. మీడియా సంస్థలకు కల్పిత వార్తల కోటా పూర్తయిందా, లేదా అని ఆమె వ్యంగ్యంగా స్పందించారు.
ఆ సంఘటనతో కథ మొదలు..
కాగా నటి త్రిష ఇటీవలే చెన్నైలో జరిగిన ఓ వివాహ వేడుకలో నటుడు, టీవీకే వ్యవస్థాపకుడు విజయ్తో కలిసి కనిపించినప్పటి నుంచి వార్తల్లో నిలుస్తున్నారు. అయితే ఈ హాజరు సమయం వివాదాస్పదంగా మారింది. ఎందుకంటే ఈ ఇద్దరూ కలిసి బహిరంగంగా కనిపించడం, విజయ్ భార్య సంగీత విడాకుల కోసం పిటిషన్ దాఖలు చేసిన కొన్ని రోజులకే జరిగింది. ఇదిలా ఉండగా చెన్నై వివాహ వేడుకలో త్రిష, విజయ్ వీడియోలు సోషల్ మీడియాలో వైరల్ అయిన వెంటనే, విజయ్ తన టీవీకే సభలో పరోక్షంగా వ్యభిచారం, విడాకులపై వస్తున్న ఆరోపణలకు స్పందించారు. మరోవైపు విజయ్తో తన సంబంధంపై వస్తున్న ప్రచారాల మధ్య తనపై విమర్శలు చేసిన నటుడు పార్థిబన్కు త్రిష గట్టి సమాధానం ఇచ్చారు. కొద్ది రోజుల క్రితమే త్రిష ప్రేమ, శాంతి, ఆత్మగౌరవంపై పలు సందేశాత్మక పోస్టులను పంచుకున్నారు. ఇవి కూడా సోషల్ మీడియాలో చర్చనీయాంశమయ్యాయి.
సందేశాత్మక పోస్టులు..
తరువాత ఆమె మరో పోస్టును పంచుకున్నారు. అందులో ప్రేమ అన్నది అంతా కాదు, కానీ ప్రేమ లేకుండా అంతా అర్థరహితమే అని ఉంది. దీనికి త్రిష Fact అని ఒక్క మాటతో స్పందించారు. విజయ్, త్రిష తమిళ చిత్రసీమలో అత్యంత ప్రజాదరణ పొందిన ఆన్-స్క్రీన్ జంటల్లో ఒకరు. వీరు కలిసి గిల్లి, తిరుపాచి, ఆతి, కురువి వంటి చిత్రాల్లో నటించారు. ఇటీవల లియోలో కూడా కలిసి కనిపించారు. ప్రస్తుతం త్రిష నటుడు సూర్యతో కలిసి నటించిన తన తమిళ చిత్రం కరుప్పు విడుదల కోసం ఎదురుచూస్తున్నారు.
