Sravanam : తెలుగు నెలలు చైత్రంతో మొదలు అవుతాయి. హిందూ క్యాలెండర్ ప్రకారం శ్రావణ మాసం ఐదవ నెల. ఆషాఢ మాసం తర్వాత శ్రావణ మాసం వస్తుంది. పౌర్ణమి రోజున శ్రావణ నక్షత్రం ఈ నెలలో పాలిస్తుంది. అందుకే దీన్ని శ్రావణ మాసం అని అంటారు. ఈ తెలుగు నెలలో ఈశ్వరుడిని, శ్రీ మహావిష్ణువు, లక్ష్మీ దేవిని పూజిస్తే ఎంతో మంచి జరుగుతుంది. ఈ నెలలోనే వరలక్ష్మీ వ్రతం, మంగళ గౌరీ వ్రతం వస్తాయి. నాగ పంచమి, రాఖీ పౌర్ణమి వంటివి కూడా వస్తాయి.
కానీ ఈసారి రెండు శ్రావణ మాసాలు వచ్చాయి. ప్రతి ఏడాది కూడా ఇంగ్లిష్ క్యాలెండర్ ప్రకారం 12 నెలలు. తెలుగు పంచాంగం ప్రకారం కూడా 12 నెలలే వస్తూ ఉంటాయి. అయితే 2023లో అధిక శ్రావణ మాసంతో 13 నెలలు వచ్చాయి. ప్రతి మూడేళ్లకు ఒక మాసం ఎక్కువగా వచ్చి 13 నెలలు వస్తుంటాయి. ఎందుకు రెండు శ్రావణ మాసాలు వచ్చాయి..? ఈ శ్రావణ మాసంని ఏం అంటారు..? అసలు ఈ శ్రావణ మాసంలో ఏం చెయ్యాలి వంటివి ఇప్పుడు చూద్దాం.
అధిక శ్రావణ మాసం 19 ఏళ్లకు ఓ సారి వస్తుంది. ఇలా వచ్చే దానినే అధిక శ్రావణం అని అంటారు. తెలుగు పంచాంగం ప్రకారం చూస్తే జూలై 18 నుంచి ఆగస్టు 16వ తేదీ వరకు కూడా అధిక శ్రావణ మాసం ఉంది. ఆగస్టు 17వ తేదీ నుండి సెప్టెంబర్ 16వ తేదీ వరకు నిజ శ్రావణం. దక్షిణయానంలో వచ్చే విశిష్టమైన మాసాల్లో ఒకటైన ఈ శ్రావణ మాసంలో శివుడిని ఆరాధిస్తే ఎంతో మంచి జరుగుతుంది.
ఈ అధిక మాసంలో పెళ్లిళ్లు చేసుకోకూడదు. అలానే కొత్త షాపులని మొదలు పెట్టడం వంటివి అధిక మాసంలో చెయ్యకూడదు. కొత్త ఇంటి కోసం భూమి పూజలు చేయడం వంటివి చేయకూడదు. అదే విధంగా ఉపనయనము, పెళ్లిళ్లు వంటి శుభకార్యాలు కూడా చేసుకోకూడదు.
