భారత క్రికెట్ నియంత్రణ మండలి (బీసీసీఐ) బుధవారం (మార్చి 11, 2026) ఇండియన్ ప్రీమియర్ లీగ్ (ఐపీఎల్) 2026 తొలి దశ షెడ్యూల్ను ప్రకటించింది. ఈ తొలి దశ మ్యాచ్లు మార్చి 28 నుంచి ఏప్రిల్ 12, 2026 వరకు జరగనున్నాయి. ఇదే సమయంలో మూడు రాష్ట్రాల్లో అసెంబ్లీ ఎన్నికలు జరగనున్నందున, ఎన్నికల తేదీలు ప్రకటించిన తర్వాత టోర్నమెంట్ పూర్తి షెడ్యూల్ను విడుదల చేయనున్నట్లు బీసీసీఐ తెలిపింది. ప్రపంచంలోనే అతిపెద్ద టీ20 లీగ్గా గుర్తింపు పొందిన ఈ టోర్నీ 19వ ఎడిషన్లో తొలి మ్యాచ్లో డిఫెండింగ్ చాంపియన్ రాయల్ ఛాలెంజర్స్ బెంగళూరు (ఆర్సీబీ) జట్టు సన్రైజర్స్ హైదరాబాద్ (ఎస్ఆర్హెచ్)తో తలపడనుంది. ఈ మ్యాచ్ బెంగళూరులోని ఎం. చిన్నస్వామి స్టేడియంలో జరుగుతుంది.
20 మ్యాచ్లకు తొలి షెడ్యూల్..
ఈ దశలో మొత్తం 20 మ్యాచ్లు 10 వేదికల్లో జరుగుతాయి. బెంగళూరు, ముంబై, గువాహటి, న్యూ చండీగఢ్, లక్నో, కోల్కతా, చెన్నై, ఢిల్లీ, అహ్మదాబాద్, హైదరాబాద్ నగరాలు ఈ మ్యాచ్లకు ఆతిథ్యం ఇస్తాయి. ఈ కాలంలో టోర్నమెంట్లో 4 డబుల్ హెడ్డర్లు ఉండనున్నాయి. మధ్యాహ్నం మ్యాచ్లు భారత కాలమానం ప్రకారం 3:30 గంటలకు ప్రారంభమవుతాయి. సాయంత్రం మ్యాచ్లు రాత్రి 7:30 గంటలకు ప్రారంభం అవుతాయి. ప్రారంభ మ్యాచ్ శనివారం జరుగుతుండగా, తదుపరి రోజు ఆదివారం ముంబైలోని వాంఖడే స్టేడియంలో ముంబై ఇండియన్స్ జట్టు కోల్కతా నైట్ రైడర్స్తో పోటీ పడనుంది. ఈ సీజన్లో తొలి డబుల్ హెడ్డర్ మ్యాచ్లు 2026 ఏప్రిల్ 4న జరుగుతాయి. ఆ రోజు మధ్యాహ్నం ఢిల్లీ అరుణ్ జైట్లీ స్టేడియంలో ఢిల్లీ క్యాపిటల్స్, ముంబై ఇండియన్స్ మధ్య మ్యాచ్ జరుగుతుంది. అనంతరం సాయంత్రం అహ్మదాబాద్లోని నరేంద్ర మోదీ స్టేడియంలో గుజరాత్ టైటాన్స్ జట్టు రాజస్థాన్ రాయల్స్తో తలపడుతుంది.
ఏయే టీమ్ల హోమ్ మ్యాచ్లు ఎక్కడెక్కడ..
రాజస్థాన్ రాయల్స్ తమ హోమ్ మ్యాచ్లను గువాహటిలో ప్రారంభించనుంది. అక్కడ చెన్నై సూపర్ కింగ్స్, ముంబై ఇండియన్స్ జట్లకు ఆతిథ్యం ఇవ్వనుంది. మరోవైపు పంజాబ్ కింగ్స్ తమ ప్రారంభ హోమ్ మ్యాచ్లను న్యూ చండీగఢ్లోని పీసీఏ స్టేడియంలో ఆడనుంది. ఐపీఎల్ 2026 తొలి దశకు సంబంధించిన పూర్తి షెడ్యూల్ వివరాలను అధికారికంగా ప్రకటించినట్లు బీసీసీఐ తెలిపింది. ఈ సీజన్లో రాయల్ ఛాలెంజర్స్ బెంగళూరు జట్టు ఐదు హోమ్ మ్యాచ్లను బెంగళూరులో ఆడుతుంది. మిగిలిన రెండు హోమ్ మ్యాచ్లు రాయ్పూర్లో జరుగుతాయి. పంజాబ్ కింగ్స్ జట్టు నాలుగు హోమ్ మ్యాచ్లను న్యూ చండీగఢ్లో ఆడుతుండగా, మరో మూడు మ్యాచ్లు ధర్మశాలలో జరుగుతాయి. రాజస్థాన్ రాయల్స్ జట్టు మూడు హోమ్ మ్యాచ్లను గువాహటిలో, నాలుగు మ్యాచ్లను జైపూర్లో ఆడనుంది.
ఇక బెంగళూరులో నిర్వహించాల్సిన మ్యాచ్లు కర్ణాటక ప్రభుత్వం ఏర్పాటు చేసిన నిపుణుల కమిటీ అనుమతిపై ఆధారపడి ఉంటాయని బీసీసీఐ తెలిపింది. ఈ కమిటీ 2026 మార్చి 13న ఎం. చిన్నస్వామి స్టేడియాన్ని పరిశీలించనుంది. ఆ రోజున మ్యాచ్ నిర్వహణ ఏర్పాట్లపై పూర్తి స్థాయి మాక్ డెమో నిర్వహించి స్టేడియం ఐపీఎల్ మ్యాచ్లకు సిద్ధంగా ఉందా లేదా అనే విషయాన్ని అంచనా వేయనున్నారు.
