Sr NTR : తెలుగు సినీ పరిశ్రమకు ఒకప్పుడు ఎన్టీఆర్, ఏఎన్ఆర్ రెండు కళ్లులా ఉండేవారు. వారి తర్వాత చిరంజీవి, బాలకృష్ణ తెలుగు సినిమా స్థాయిని పెంచడంలో ఎంతో కృషి చేశారు. వీరిద్దరికి భీబత్సమైన ఫ్యాన్ ఫాలోయింగ్ ఉండగా, వీరు చేసిన సినిమాలకి బాక్సాఫీస్ దగ్గర మంచి వసూళ్లు వచ్చేవి. మెగాస్టార్ చిరంజీవి, నట సింహం బాలకృష్ణ ఆరేళ్ల లాంగ్ గ్యాప్ తర్వాత మరోసారి బాక్సాఫీస్ దగ్గర పోటీపడ్డారు. ఈ పోటీలో ఈ రెండు సినిమాలు విజయాలు సాధించాయి. చిరంజీవి నటించిన `వాల్తేర్ వీరయ్య`, బాలకృష్ణ నటించిన `వీరసింహారెడ్డి` చిత్రాలు బాక్సాఫీస్ దగ్గర అతి పెద్ద విజయం సాధించాయి.
అయితే ఇటీవల చిరంజీవి, బాలకృష్ణ గురించి వైజయంతి మూవీస్ అధినేత అశ్వినీదత్ ఓ ఆసక్తికర విషయం పంచుకున్నారు.నిర్మాత అశ్వినీ దత్ ఎన్టీఆర్, చిరంజీవి లతో ఎక్కువ సినిమాలు రూపొందించారు. చిరంజీవితో జగదేకవీరుడు అతిలోకసుందరి, చూడాలని ఉంది, ఇంద్ర లాంటి బ్లాక్ బస్టర్స్ రూపొందించారు.అలాగే బాలయ్యతో అశ్వమేధం చిత్రాన్ని రూపొందించారు. ఒకసారి ఓ చిత్ర షూటింగ్ విరామంలో ఎన్టీఆర్, అల్లు రామలింగయ్య ముచ్చటించుకోగా, వారిద్దరి మధ్య వచ్చిన చర్చని తాజాగా అశ్వినీదత్ చెప్పుకొచ్చారు.
ఎన్టీఆర్, అల్లు రామలింగయ్య మాటల మధ్యలో చిరంజీవి నటించిన ఖైదీ, అడవి దొంగ, పసివాడి ప్రాణం లాంటి చిత్రాలు, అలాగే బాలయ్య నటించిన మంగమ్మగారి మనవడు, అనసూయమ్మ గారి అల్లుడు, మువ్వా గోపాలుడు లాంటి చిత్రాల విజయాల గురించి చర్చకు రాగా, సినీ పరిశ్రమ మీ అల్లుడు చిరంజీవి, మా కొడుకు బాలయ్యదేనని పెద్దాయన ఎన్టీఆర్ అల్లు రామలింగయ్యతో తరచూ అనేవారని… ఆ తర్వాత ఆ పెద్దాయన చెప్పినట్టుగానే ఆ ఇద్దరు హీరోలు అనేక సినిమా విజయాలతో సినీ పరిశ్రమలో స్టార్స్ గా ఎదిగారని ఓ ఇంటర్వ్యూలో నిర్మాత సి. అశ్విని దత్ తెలియజేశారు. ఆరుపదుత వయస్సులోను ఈ ఇద్దరు హీరోలు ఇండస్ట్రీని దున్నేయడం విశేషం.
