Karthikeya 2 : ప్రస్తుతం ఎక్కడ చూసినా కార్తికేయ-2 మానియానే కనిపిస్తోంది. ఎన్నో వాయిదాల తర్వాత విడుదలైన ఈ చిత్రం మొదటి షో నుండి పాజిటివ్ టాక్ తెచ్చుకుని బాక్సాఫీస్ వద్ద దూసుకుపోతోంది. తొలి రోజు లిమిటెడ్ స్క్రీన్లలో విడుదలైన ఈ చిత్రం రెండో రోజుకు స్క్రీన్ కౌంట్ రెట్టింపైంది. ఇక ఫస్ట్డేకు మించిన కలెక్షన్ లను సెకండ్ డే సాధించి.. కంటెంట్ ఉంటే కలెక్షన్లకు తిరుగుండదని మరోసారి నిరూపించింది. కేవలం టాలీవుడ్లోనే కాకుండా విడుదలైన అన్ని భాషల్లోనూ ఈ మూవీ మంచి వసూళ్ళను సాధిస్తోంది.
ముఖ్యంగా బాలీవుడ్లో రోజు రోజుకూ కార్తికేయ-2పై క్రేజ్ పెరిగిపోతోంది. కార్తికేయ-2 చిత్రం బాలీవుడ్లో మొదటి రోజు కేవలం 60 స్క్రీన్లలో విడుదలైంది. ఇక రెండో రోజు ఏకంగా 300 స్క్రీన్లకు పెరిగింది. దీనికి పోటీగా అమీర్ఖాన్ లాల్ సింగ్ చడ్డా, అక్షయ్ కుమార్ రక్షా బంధన్ వంటి సినిమాలున్నా బాలీవుడ్ ప్రేక్షకులు కార్తికేయ-2 చిత్రం వైపే మొగ్గు చూపుతున్నారు. ఈ చిత్రంతో యంగ్ హీరో నిఖిల్కు బాలీవుడ్ లో మంచి గుర్తింపు వచ్చింది.
ఈవారం వచ్చే కృష్ణాష్టమికి ఈ సినిమా పీక్స్కి చేరుకుంటుందని ట్రేడ్ వర్గాలు అంచనా వేస్తున్నాయి. శ్రీకృష్ణుడి గొప్పతనాన్ని చాటిచెప్పే చిత్రం కావడంతో హిందూ అనుకూల ప్రేక్షకులు ఈ కాన్సెప్ట్ని ఆదరించి థియేటర్లకు తరలి వస్తున్నారు. ఈ సినిమా మరికొన్ని వారాలు మంచి ఆక్యుపెన్సీలతో రన్ అవ్వడం ఖాయంగా కనిపిస్తోంది.
దేశంలో సంచలనం సృష్టించిన ది కాశ్మీర్ ఫైల్స్ మూవీకి కూడా ఇదే విధమైన స్పందన లభించిందని ట్రేడ్ వర్గాలు అంటున్నాయి. ఆ చిత్రం కూడా హిందూత్వ వేవ్ పై 2022లో సూపర్ హిట్ గా నిలిచింది. కాబట్టి కార్తికేయ 2 కూడా మినీ కాశ్మీర్ ఫైల్స్ గా మారుతోంది అంటున్నారు. నిర్మాత అభిషేక్ అగర్వాల్ మరోసారి జాక్పాట్ కొట్టారు. అలాగే నిఖిల్ ఈ సినిమాతో తన కెరీర్లో బిగ్గెస్ట్ హిట్ అందుకున్నాడు. ఈ సినిమాతో ఇకముందు నిఖిల్ కి బాలీవుడ్ ఆఫర్స్ వచ్చే ఛాన్స్ ఉందని కూడా అంటున్నారు. ఈ క్రమంలోనే కార్తికేయ 2 భారీ హిట్ అవడంపై చిత్ర యూనిట్ సభ్యులు ఎంతో సంతోషం వ్యక్తం చేస్తున్నారు.
