పెంపుడు కుక్క బొచ్చుతో స్కార్ఫ్ చేయించుకున్న మహిళ..!

సాధారణంగా మనం గొర్రెల నుంచి తీసిన ఉన్నితో వివిధ రకాల బ్లాంకెట్స్, జర్కిన్లు, మఫ్లర్లు, స్కార్ఫ్‌ల వంటి వాటిని తయారుచేయడం గురించి విన్నాము. కానీ.. మీరెప్పుడైనా కుక్క బొచ్చుతో స్కార్ఫ్ ను తయారు చేయించడం విన్నారా.. వినడానికి ఆశ్చర్యంగా ఉన్నా ఇది నిజం. మిషెల్‌ పార్కర్ అనే మహిళ తన పెంపుడు కుక్క బొచ్చుతో స్కార్ఫ్ చేయించుకుంది.. అసలు కుక్క బొచ్చుతో స్కార్ఫ్ చేయించుకోవడానికి గల కారణం ఏమిటి అనే విషయానికి వస్తే..

మిషెల్‌ పార్కర్ అనే మహిళకు పెంపుడు జంతువులంటే చాలా ఇష్టం. ఈ మహిళ 2 పెంపుడు కుక్కలను పెంచుకుంటోంది. వాటి పేర్లను లూకా, కిషోన్డ్ గా పెట్టుకుని వాటిని ఎంతో అపురూపంగా చూసుకునేది. పెంపుడు కుక్కలు నిత్యం తన వెంటే ఉంటూ తన పట్ల ఎంతో ప్రేమను, విశ్వాసాన్ని ప్రదర్శించేవి. అయితే పెంపుడు కుక్కలు మనం జీవించి ఉన్నంత కాలం ఉండవు. కనుక ఎప్పుడో ఒక రోజు ఆ కుక్కలు తనని వదిలి వెళ్లిపోతాయని, చనిపోతాయని భావించిన పార్కర్ వాటి గుర్తుగా తన దగ్గర ఏదైనా ఉండాలని భావించింది.

ఈ క్రమంలోనే ఫేస్ బుక్ లో ఒక వ్యక్తి పెంపుడు కుక్క బొచ్చుతో స్కార్ఫ్ చేయించుకున్నాడని తెలియడంతో సదరు మహిళ కూడా ఎలాగైనా తను స్కార్ఫ్ చేయించుకోవాలని ఏకంగా 18 వేల రూపాయలను ఖర్చు చేసి తన రెండు పెంపుడు కుక్కలు నుంచి 525 గ్రాముల బొచ్చును తీసుకుని స్కార్ఫ్ తయారు చేయించుకుంది. ఈ విధంగా తనకు ఎంతో ఇష్టమైన పెంపుడు కుక్కల పట్ల ఉన్న ప్రేమను వ్యక్తపరుస్తూ స్కార్ఫ్ చేయించుకోవడంతో ఈ విషయం కాస్తా సోషల్ మీడియాలో వైరల్ గా మారింది.