జీమెయిల్ స్టోరేజ్ నిండిపోయిందా? ఈ సింపుల్ ట్రిక్స్‌తో నిమిషాల్లో స్పేస్ ఖాళీ చేసుకోండి!

జీమెయిల్ వినియోగదారుల్లో చాలా మందికి ఎదురయ్యే సాధారణ సమస్య స్టోరేజ్ ఫుల్. స్టోరేజ్ పూర్తైంది, కొత్త మెయిల్స్ రావాలంటే మెయిల్స్ డిలీట్ చేయండి లేదా స్టోరేజ్ కొనండి.. అనే నోటిఫికేషన్లు రావడం ఇప్పుడు కొత్తేమీ కాదు. గూగుల్ ప్రతి జీమెయిల్ అకౌంట్‌కు 15 జీబీ ఉచిత స్టోరేజ్ ఇస్తుంది. ఇందులో Gmail, Google Drive, Google Photos అన్నీ కలిసే ఉంటాయి. అయితే ప్రమోషనల్ మెయిల్స్, న్యూస్‌లెటర్స్, భారీ అటాచ్‌మెంట్లు ఉన్న మెయిల్స్ కారణంగా ఈ స్టోరేజ్ వేగంగా నిండిపోతుంది. కానీ ముఖ్యమైన మెయిల్స్ తొలగించకుండా, కేవలం కొన్ని నిమిషాల్లో జీమెయిల్‌లో స్పేస్ ఖాళీ చేయాలంటే ఈ చిట్కాలు మీకు ఉపయోగపడతాయి.

పెద్ద ఫైల్స్‌ను ఇలా తీసేయండి..

మీ జీమెయిల్ స్టోరేజ్ ఫుల్ అయిందంటే ముందుగా Google Storage పేజీకి వెళ్లి ఏది ఎక్కువ స్థలాన్ని ఆక్రమిస్తుందో చెక్ చేయాలి. అక్కడ Gmail, Drive, Photos విడివిడిగా ఎంత స్పేస్ తీసుకుంటున్నాయో చూపిస్తుంది. డ్రైవ్ లేదా ఫోటోలు ఎక్కువ స్పేస్ తీసుకుంటే అవసరం లేని ఫైల్స్, డూప్లికేట్ ఫోటోలను తొలగించండి. ఇక జీమెయిల్ సెర్చ్ బార్‌లో larger:10M అని టైప్ చేస్తే 10 ఎంబీకి మించిన మెయిల్స్ అన్నీ కనిపిస్తాయి. వీటిలో అవసరం లేని మెయిల్స్, పాత అటాచ్‌మెంట్లు ఉన్న మెయిల్స్‌ను డిలీట్ చేయండి. డిలీట్ చేసిన తర్వాత Trash ఫోల్డర్‌ను ఖాళీ చేయడం మర్చిపోవద్దు. లేకపోతే స్పేస్ రిలీజ్ అవ‌దు.

సెంట్ మెయిల్ కూడా ముఖ్య‌మే..

వెబ్‌సైట్లు, ఆఫర్లు, షాపింగ్ యాప్స్ కారణంగా రోజూ వందలాది ప్రమోషనల్ మెయిల్స్ వస్తుంటాయి. ఇవి చదవకపోయినా స్టోరేజ్ మాత్రం తీసుకుంటాయి. కాబట్టి అవసరం లేని న్యూస్‌లెటర్స్ నుంచి Unsubscribe అవ్వండి. అలాగే పాత ప్రమోషనల్ మెయిల్స్‌ను ఒకేసారి సెలెక్ట్ చేసి డిలీట్ చేయండి. ఇక చాలామంది మర్చిపోతారు కానీ Sent Mail, Spam కూడా పెద్ద మొత్తంలో స్పేస్ తీసుకుంటాయి. సెర్చ్ బార్‌లో in:sent has:attachment అని టైప్ చేస్తే మీరు పంపిన భారీ అటాచ్‌మెంట్లు ఉన్న మెయిల్స్ కనిపిస్తాయి. అక్క‌డ‌ అవసరం లేని వాటిని తొలగించండి. స్పామ్ ఫోల్డర్‌ను కూడా ఖాళీ చేయండి.

ఇలా చిన్నచిన్న చిట్కాల‌ను పాటిస్తే మీ జీమెయిల్ ఖాతాలో కొన్ని నిమిషాల్లోనే అధిక‌ మొత్తంలో స్టోరేజ్ ఖాళీ చేయవచ్చు. తరచుగా ఈ ప్రక్రియను పాటిస్తే, స్టోరేజ్ కొనాల్సిన అవసరం ఉండదు. జీమెయిల్‌ను సాఫీగా ఉపయోగించుకోవచ్చు.