ఐపీఎల్ 2021: హైద‌రాబాద్ కు ఇంకో ఓట‌మి.. రాజ‌స్థాన్ రాయ‌ల్స్ ఘ‌న విజ‌యం..

ఢిల్లీలో జ‌రిగిన ఇండియ‌న్ ప్రీమియ‌ర్ లీగ్ (ఐపీఎల్‌) 2021 టోర్నీ 28వ మ్యాచ్‌లో రాజ‌స్థాన్ రాయ‌ల్స్ విజ‌యం సాధించింది. ఆ జ‌ట్టు నిర్దేశించిన ల‌క్ష్యాన్ని ఛేదించే క్ర‌మంలో స‌న్‌రైజ‌ర్స్ హైద‌రాబాద్ త‌డ‌బ‌డింది. ఎప్ప‌టిక‌ప్పుడు వికెట్ల‌ను కోల్పోతూ వ‌చ్చింది. ఏ ద‌శ‌లోనూ ప‌రుగులు చేద్దామ‌ని హైద‌రాబాద్ బ్యాట్స్‌మెన్ అనుకోలేదు. చెత్త షాట్లు ఆడి వికెట్ల‌ను స‌మ‌ర్పించుకున్నారు. దీంతో హైద‌రాబాద్‌పై రాజ‌స్థాన్ 55 ప‌రుగుల తేడాతో ఘ‌న విజ‌యం సాధించింది.

మ్యాచ్‌లో టాస్ గెలిచిన హైద‌రాబాద్ ముందుగా ఫీల్డింగ్ ఎంచుకుంది. ఈ క్ర‌మంలో రాజ‌స్థాన్ బ్యాటింగ్ చేసింది. నిర్ణీత 20 ఓవ‌ర్ల‌లో రాజ‌స్థాన్ 3 వికెట్ల న‌ష్టానికి 220 ప‌రుగులు చేసింది. రాజ‌స్థాన్ బ్యాట్స్‌మెన్ల‌లో జాస్ బ‌ట్ల‌ర్‌, కెప్టెన్ సంజు శాంస‌న్‌లు రాణించారు. 64 బంతుల్లో బ‌ట్ల‌ర్ 11 ఫోర్లు, 8 సిక్స‌ర్ల‌తో 124 ప‌రుగులు చేశాడు. 33 బంతుల్లో శాంస‌న్ 4 ఫోర్లు, 2 సిక్స‌ర్ల‌తో 48 ప‌రుగులు చేశాడు. హైద‌రాబాద్ బౌల‌ర్ల‌లో సందీప్ శ‌ర్మ‌, ర‌షీద్ ఖాన్‌, విజ‌య్ శంక‌ర్‌ల‌కు త‌లా 1 వికెట్ ద‌క్కింది.

అనంత‌రం బ్యాటింగ్ చేసిన హైద‌రాబాద్ 20 ఓవ‌ర్ల‌లో 8 వికెట్ల‌ను కోల్పోయి 165 ప‌రుగులు చేసింది. ఆ జ‌ట్టు బ్యాట్స్‌మెన్ల‌లో ఎవ‌రూ చెప్పుకోద‌గిన ప్ర‌ద‌ర్శ‌న చేయ‌లేదు. రాజ‌స్థాన్ బౌల‌ర్ల‌లో ముస్తాఫిజుర్ ర‌హ‌మాన్‌, క్రిస్ మోరిస్‌లు 3 వికెట్ల చొప్పున ప‌డ‌గొట్టారు. కార్తీక్ త్యాగి, రాహుల్ తెవాతియాల‌కు చెరొక వికెట్ ద‌క్కింది.