ఐపీఎల్ 2021: చెన్నై చేతిలో బెంగ‌ళూరు చిత్తు.. విజ‌యాల ప‌రంప‌ర‌కు బ్రేక్‌..!

ముంబైలో జ‌రిగిన ఇండియ‌న్ ప్రీమియ‌ర్ లీగ్ (ఐపీఎల్‌) 2021 టోర్నీ 19వ మ్యాచ్‌లో చెన్నై సూప‌ర్ కింగ్స్ ఘ‌న విజ‌యం సాధించింది. చెన్నై నిర్దేశించిన భారీ ల‌క్ష్యాన్ని ఛేదించే క్ర‌మంలో బెంగ‌ళూరు త‌డ‌బ‌డింది. గ‌త 4 మ్యాచ్‌ల‌లోనూ ఓట‌మి అంటూ ఎరుగ‌ని జ‌ట్టుగా బెంగ‌ళూరు విజ‌యాల ప‌రంప‌ర‌ను న‌మోదు చేసింది. అయితే బెంగ‌ళూరుకు దూకుడుకు చెన్నై బ్రేక్ వేసింది. ఈ క్ర‌మంలో బెంగ‌ళూరుపై చెన్నై 69 ప‌రుగుల తేడాతో ఘ‌న విజ‌యం సాధించింది.

మ్యాచ్‌లో టాస్ గెలిచిన చెన్నై ముందుగా బ్యాటింగ్ చేపట్టింది. ఈ క్ర‌మంలో ఆ జ‌ట్టు నిర్ణీత 20 ఓవ‌ర్ల‌లో 4 వికెట్ల న‌ష్టానికి 191 ప‌రుగులు చేసింది. చెన్నై బ్యాట్స్‌మెన్ల‌లో ర‌వీంద్ర జ‌డేజా, డుప్లెసిస్‌లు అద్భుతంగా రాణించారు. 28 బంతుల్లోనే జ‌డేజా 4 ఫోర్లు, 5 సిక్స‌ర్ల‌తో 62 ప‌రుగులు చేసి నాటౌట్‌గా నిల‌వ‌గా, 41 బంతుల్లో డుప్లెసిస్ 5 ఫోర్లు, 1 సిక్స‌ర్‌తో 50 ప‌రుగులు చేశాడు. బెంగ‌ళూరు బౌల‌ర్ల‌లో హ‌ర్ష‌ల్ ప‌టేల్ 3 వికెట్లు ప‌డ‌గొట్ట‌గా, య‌జువేంద్ర చాహ‌ల్‌కు 1 వికెట్ ద‌క్కింది.

అనంత‌రం బ్యాటింగ్ చేసిన బెంగ‌ళూరు 20 ఓవ‌ర్ల‌లో 9 వికెట్లు కోల్పోయి 122 ప‌రుగులు మాత్ర‌మే చేయ‌గ‌లిగింది. ఆ జ‌ట్టు బ్యాట్స్‌మెన్ల‌లో ప‌డిక్క‌ల్ మిన‌హా ఎవ‌రూ రాణించ‌లేదు. 15 బంతుల్లో ప‌డిక్క‌ల్ 4 ఫోర్లు, 2 సిక్స‌ర్ల‌తో 34 ప‌రుగులు చేశాడు. చెన్నై బౌల‌ర్ల‌లో జ‌డేజా 3 వికెట్లు ప‌డ‌గొట్ట‌గా, ఇమ్రాన్ తాహిర్ 2 వికెట్లు తీశాడు. శామ్ కుర్రాన్‌, శార్దూల్ ఠాకూర్‌ల‌కు చెరొక వికెట్ ద‌క్కింది.