దేశవ్యాప్తంగా కరోనా సెకండ్ వేవ్ విజృంభిస్తున్న సంగతి తెలిసిందే. ఈ క్రమంలోనే రోజూ దేశంలో 3.50 లక్షలకు పైగా కోవిడ్ కేసులు నమోదవుతున్నాయి. బుధవారం ఒక్క రోజే రికార్డు స్థాయిలో కోవిడ్ కేసులు నమోదయ్యాయి. దీంతో అనేక రాష్ట్రాల్లో ఇప్పటికే లాక్డౌన్లను విధించి అమలు చేస్తున్నారు. అయితే తెలంగాణలో లాక్డౌన్ విధించే అంశంపై సీఎం కేసీఆర్ కీలక ప్రకటన చేశారు.
కరోనా నుంచి కోలుకున్న తరువాత సీఎం కేసీఆర్ అనేక రోజులకు ప్రగతి భవన్ చేరుకుని చీఫ్ సెక్రెటరీ సోమేష్ కుమార్తోపాటు ఇతర వైద్య శాఖ అధికారులతో కలిసి రాష్ట్రంలో కోవిడ్ పరిస్థితిపై సమీక్షా సమావేశం నిర్వహించారు. ఈ సందర్భంగా ఆయన మాట్లాడుతూ రాష్ట్రంలో లాక్డౌన్ విధించే ప్రసక్తే లేదన్నారు.
లాక్డౌన్ విధించినప్పటికీ పలు రాష్ట్రాల్లో కోవిడ్ కేసుల సంఖ్య విపరీతంగా పెరుగుతూనే ఉందని, అందువల్ల తెలంగాణలో లాక్డౌన్ విధించబోమని అన్నారు. లాక్డౌన్ వల్ల ప్రజల జీవితాలు నాశనమవుతాయని, ఆర్థిక వ్యవస్థ కుప్పకూలుతుందన్నారు. అయితే రాష్ట్రంలో వీకెండ్ లాక్డౌన్ను విధించాలని హైకోర్టు సూచించిన నేపథ్యంలో దానిపై సీఎం కేసీఆర్ నిర్ణయం తీసుకోనున్నారు. హైకోర్టు సూచించినందువల్లే రాష్ట్రంలో రాత్రి కర్ఫ్యూను విధించారు కనుక కోర్టు ఆదేశాల మేరకు తెలంగాణలో వీకెండ్ లాక్డౌన్ను విధించే అవకాశం ఉన్నట్లు తెలుస్తోంది.
