Sonu Sood : వెండితెరపై విలనిజం ప్రదర్శించిన సోనూసూద్ రియల్ లైఫ్లో మాత్రం ఎన్నో సేవా కార్యక్రమాలు చేపట్టి రియల్ హీరోగా గుర్తింపు తెచ్చుకున్నారు. కోవిడ్ పరిస్థితుల్లో సామాన్యులకు, మధ్య తరగతి వారికి సేవలు అందించి అండగా నిలబడి రియల్ హీరో అనిపించుకున్న వ్యక్తి సోనూసూద్. ఉక్రెయిన్లో చిక్కుకుపోయిన భారతీయ విద్యార్థులకు కూడా దేవుడుగా మారారు. ఆయన చారిటీ సాయంతో క్షేమంగా భారత్కు తరలించారు. వారంతా సోషల్ మీడియా వేదికగా ఆయనకు ధన్యవాదాలు తెలిపారు. ఇలా బాలీవుడ్ నటుడు సోనూసూద్ సేవలు ఉక్రెయిన్కు కూడా చేరుకున్నాయి.
ఒకవైపు సినిమాలలో నటిస్తూనే మరొక వైపు అడిగిన వారికి లేదు.. కాదు.. అనకుండా సహాయం చేస్తున్నారు సోనుసూద్. అయితే కొందరు నెటిజన్స్ ఆయనతో చమత్కారాలు చేస్తుండడం ఆశ్చర్యాన్ని కలిగిస్తుంటుంది. తాజాగా ఓ నెటిజన్ చలికాలంలో దుప్పట్లు పంచారు.. అదేవిధంగా వేసవి కాలంలో చల్లని బీరు కూడా పంపిణీ చేస్తే బాగుంటుందన్నాడు. ఈ పోస్ట్ ని ఉద్దేశిస్తూ సోనూసూద్ బీర్ తోపాటుగా స్టఫ్ కూడా ఉంటే బాగుంటుంది.. అంటూ ఫన్నీగా రిప్లై ఇచ్చాడు. దీనిపై నెటిజన్స్ పలు రకాలుగా స్పందిస్తున్నారు.
ఇక కొద్ది రోజులుగా సోనూసూద్ పొలిటికల్ ఎంట్రీపై జోరుగా ప్రచారాలు నడుస్తున్నాయి. ఈ క్రమంలోనే ఆయన స్పందించారు. సమాజసేవ అనేది తమ రక్తంలోనే ఉందని, తన తల్లి ఒక ప్రొఫెసర్ అని, పిల్లలకు తన జీవిత పాఠాలన్నీ నేర్పారని అన్నారు. అదేవిధంగా తన తండ్రి ఒక సామాజిక కార్యకర్త అని, మోగాలో చాలా పాఠశాలలు, కళాశాలలు, ధర్మశాలలను తన కుటుంబం నిర్మించిందని అన్నారు. ఇప్పుడు తన సోదరి కూడా తన తల్లిదండ్రుల అనుసరిస్తోందని, పంజాబ్లోని మోగా సిటీలో ఎన్నో సామాజిక సేవా కార్యక్రమాల్లో పాల్గొన్నారని సోనూసూద్ చెప్పారు. వచ్చే ఎన్నికల నాటికి రాజకీయాల్లోకి వస్తానని సోనూసూద్ ప్రకటించారు. తన సామాజిక కార్యక్రమాలను, ఎన్నికలు రెండింటినీ నిర్వహించడానికి తనకు తగినంత పెద్ద టీమ్ లేదని అన్నారు.
