Vankaya Wey Fry Recipe : వంకాయ కూర‌ను ఒక్క‌సారి ఇలా చేయండి.. రుచి చూస్తే జ‌న్మ‌లో మ‌రిచిపోరు..!

Vankaya Wey Fry Recipe : మ‌న‌కు అందుబాటులో ఉన్న అనేక ర‌కాల కూర‌గాయ‌ల్లో వంకాయ‌లు కూడా ఒక‌టి. ఇవి అనేక ఆరోగ్య‌క‌ర‌మైన ప్ర‌యోజ‌నాల‌ను అందిస్తాయి. వంకాయ‌ల‌తో మ‌నం అనేక కూర‌ల‌ను కూడా చేస్తుంటాం. స‌రిగ్గా చేయాలే కానీ వంకాయ‌ల‌తో ఏ కూర చేసినా రుచి అదిరిపోతుంది. చాలా మంది వంకాయ‌లను ఇష్టంగా తింటుంటారు కూడా. అయితే వంకాయ‌ల‌తో ఇప్పుడు మేం చెప్ప‌బోయే విధంగా కూర చేయండి. ఇది ఎంతో రుచిగా ఉంటుంది. ఒక్క‌సారి ఇలా గ‌న‌క చేసుకున్నారంటే ఇంట్లో అంద‌రూ మ‌ళ్లీ ఇలాగే చేయ‌మ‌ని అడుగుతారు. అంత అద్భుతంగా రుచి ఉంటుంది. ఇక వంకాయ కూర‌ను ఎలా చేయాలో, అందుకు ఏమేం ప‌దార్థాలు కావాలో ఇప్పుడు తెలుసుకుందాం.

వంకాయ కూర త‌యారీకి కావ‌ల్సిన ప‌దార్థాలు..

మీడియం సైజు వంకాయ‌లు – 2 (నాలుగు ముక్క‌లుగా త‌ర‌గాలి), మీడియం సైజు ట‌మాటాలు – 2 (స‌న్న‌గా త‌ర‌గాలి), ఉల్లిపాయ – 1 (స‌న్న‌గా త‌ర‌గాలి), ప‌చ్చి మిర్చి – 2 (నిలువుగా చీరాలి), అల్లం వెల్లుల్లి పేస్ట్ – 1 టీస్పూన్‌, ఆవాలు – 1 టీస్పూన్‌, జీల‌క‌ర్ర – 1 టీస్పూన్‌, క‌రివేపాకు – 1 రెమ్మ‌, ప‌సుపు – అర టీస్పూన్‌, కారం – 1 టీస్పూన్ లేదా రుచికి స‌రిప‌డా, ధ‌నియాల పొడి – 1 టీస్పూన్‌, ఉప్పు – రుచికి స‌రిప‌డా, నూనె – 2 టేబుల్ స్పూన్లు, కొత్తిమీర ఆకులు – కొన్ని (అలంక‌ర‌ణ కోసం).

వంకాయ కూర‌ను త‌యారు చేసే విధానం..

ముందు పాన్ లేదా క‌డాయి పెట్టి అందులో నూనె వేసి మీడియం మంట‌పై వేడి చేయాలి. అనంత‌రం అందులో ఆవాల‌ను వేసి చిట‌ప‌ట‌లాడించాలి. అందులోనే జీల‌క‌ర్ర‌, క‌రివేపాకుల‌ను వేయాలి. కాసేపు సువాస‌న వ‌చ్చే వ‌ర‌కు వేయించాలి. అందులోనే స‌న్న‌గా త‌రిగిన ఉల్లిపాయ‌లు, నిలువుగా చీరిన ప‌చ్చి మిర్చి వేయాలి. ఉల్లిపాయ‌లు బంగారు గోధుమ రంగులోకి మారేంత వ‌ర‌కు వేయించాలి. అనంత‌రం అల్లం వెల్లుల్లి పేస్ట్ వేసి బాగా క‌ల‌పాలి. త‌రువాత 1 నిమిషం అయ్యాక ప‌చ్చి వాస‌న పోతుంది. అనంత‌రం అందులో స‌న్న‌గా త‌రిగిన ట‌మాటాల‌ను వేసి ట‌మాటాలు మెత్త‌గా అయ్యే వ‌ర‌కు ఉడికించాలి. అందులోనే ప‌సుపు, కారం, ధ‌నియాల పొడి, ఉప్పు వేసి బాగా క‌లిపి 2-3 నిమిషాల పాటు ఉడికించాలి. త‌రువాత త‌రిగిన వంకాయ ముక్క‌ల‌ను వేయాలి.

బాగా క‌లిపి మూత పెట్టాలి. ఇలా 10-15 నిమిషాల పాటు ఉడికించాలి. మ‌ధ్య మ‌ధ్య‌లో మూత తీసి క‌లుపుతుండాలి. అందులో నీళ్ల‌ను క‌ల‌పాల్సిన ప‌ని ఉండ‌దు. మూత పెట్టి ఉడికిస్తాం కాబ‌ట్టి అందులో ఊరే నీళ్లు స‌రిపోతాయి. దీంతో వంకాయ‌లు, ట‌మాటాలు బాగా ఉడుకుతాయి. అన్నీ బాగా ఉడికాక మూత తీసి మ‌ళ్లీ 2-3 నిమిషాల పాటు ఉడికించాలి. దీంతో అద‌నంగా ఉన్న నీరు పోతుంది. అప్పుడు కూర బాగా వ‌స్తుంది. మ‌రీ నీళ్లు లేకుండా మ‌రీ ఫ్రై కాకుండా మ‌ధ్య‌స్తంగా ఉంటుంది. దీంతో కూర రెడీ అవుతుంది. దానిపై కొత్తిమీర ఆకుల‌ను వేసి అల‌క‌రించుకుంటే చాలు. ఇలా త‌యారు చేసిన వంకాయ వెట్ ఫ్రై కూర అంద‌రికీ ఎంత‌గానో న‌చ్చుతుంది. దీన్ని అన్నం లేదా చ‌పాతీలు ఎందులో అయినా స‌రే తిన‌వ‌చ్చు. ఎంతో రుచిగా ఉంటుంది. అంద‌రూ ఇష్టంగా తింటారు.