UCO Bank Recruitment 2026 | యూసీఓ బ్యాంక్ లో స్పెష‌లిస్ట్ ఆఫీస‌ర్ పోస్టుల భ‌ర్తీ.. నెల‌కు జీతం రూ.48వేలు..

UCO Bank Recruitment 2026 | యునైటెడ్ కమర్షియల్ బ్యాంక్ (యూసీఓ బ్యాంక్) 2026 సంవత్సరానికి భారీ నియామక ప్రకటనను విడుదల చేసింది. ఈ నోటిఫికేషన్ ద్వారా మొత్తం 173 జనరలిస్ట్, స్పెషలిస్ట్ ఆఫీసర్ పోస్టులను భర్తీ చేయనుంది. స్థిరమైన బ్యాంకింగ్ కెరీర్ కోరుకునే గ్రాడ్యుయేట్లు, చార్టెడ్ అకౌంటెంట్లు, ఐటీ నిపుణులకు ఇది మంచి అవకాశంగా చెప్ప‌వ‌చ్చు. ఆన్‌లైన్ దరఖాస్తు ప్రక్రియ జనవరి 13, 2026 నుంచి ప్రారంభమై ఫిబ్రవరి 2, 2026 వరకు కొనసాగుతుంది. అదే తేదీల మధ్య దరఖాస్తు ఫీజు చెల్లించాలి. వయస్సు లెక్కింపు జనవరి 1, 2026 నాటికి ఉంటుంది. ఈ నియామకంలో జూనియర్ మేనేజ్‌మెంట్ గ్రేడ్ స్కేల్-1 (JMGS-I), మిడిల్ మేనేజ్‌మెంట్ గ్రేడ్ స్కేల్-2 (MMGS-II) పోస్టులు ఉన్నాయి.

మొత్తం 173 పోస్టులు ఖాళీ..

JMGS-I (వయస్సు 20 నుంచి 30 ఏళ్లు): ట్రేడ్ ఫైనాన్స్ ఆఫీసర్, చార్టెడ్ అకౌంటెంట్, సాఫ్ట్‌వేర్ డెవలపర్, నెట్‌వర్క్ అడ్మినిస్ట్రేటర్, డేటాబేస్ అడ్మినిస్ట్రేటర్, సిస్టమ్ అడ్మినిస్ట్రేటర్, ఫినాకిల్, మ్యూరెక్స్ డెవలపర్లు, క్లౌడ్ ఇంజనీర్, ఏఐ/ఎంఎల్ ఇంజనీర్, డేటా అనలిస్ట్, డేటా సైంటిస్ట్, సైబర్ సెక్యూరిటీ ఆఫీసర్, డేటా ప్రైవసీ కంప్లయెన్స్ ఆఫీసర్ పోస్టులు ఉన్నాయి. MMGS-II (వయస్సు 22 నుంచి 35 ఏళ్లు): ట్రెజరీ ఆఫీసర్, చార్టెడ్ అకౌంటెంట్, డేటా అనలిస్ట్, డేటా సైంటిస్ట్, డేటా ఇంజనీర్ పోస్టులు ఉన్నాయి. మొత్తంగా 173 ఖాళీలు భర్తీ చేయనున్నారు.

వేత‌నం వివ‌రాలు..

JMGS-I పోస్టులకు నెలకు సుమారు ₹48,480 నుంచి ₹85,920 వరకు, MMGS-II పోస్టులకు నెలకు ₹64,820 నుంచి ₹93,960 వరకు జీతం లభిస్తుంది. ఇవికాకుండా డీఏ, హెచ్‌ఆర్‌ఏ, సిటీ అలవెన్స్, వైద్య సదుపాయాలు ఇతర బ్యాంకు నిబంధనల ప్రకారం అందిస్తారు. సాధారణ, ఫైనాన్స్ పోస్టులకు గుర్తింపు పొందిన విశ్వవిద్యాలయం నుంచి ఏదైనా డిగ్రీ అవసరం. చార్టెడ్ అకౌంటెంట్ పోస్టులకు ఐసీఏఐ నుంచి సీఏ అర్హత తప్పనిసరి. ఐటీ, టెక్నికల్ పోస్టులకు బీటెక్, బీఈ, ఎంసీఏ లేదా కంప్యూటర్ సైన్స్‌లో పీజీ అవసరం. స్పెషలిస్ట్ పోస్టులకు ఎంబీఏ లేదా సంబంధిత పీజీ డిగ్రీ ఉండాలి. సాధారణ అభ్యర్థులకు కనీసం 60 శాతం మార్కులు, రిజర్వ్డ్ వర్గాలకు 55 శాతం మార్కులు అవసరం.

3 ఏళ్ల అనుభ‌వం..

JMGS-I పోస్టులకు కనీసం ఒక సంవత్సరం, MMGS-II పోస్టులకు కనీసం మూడు సంవత్సరాల అర్హత అనంతర అనుభవం ఉండాలి. ఎస్సీ, ఎస్టీ అభ్యర్థులకు 5 సంవత్సరాలు, ఓబీసీ (నాన్ క్రీమీ లేయర్) వారికి 3 సంవత్సరాలు, వికలాంగులకు 10 సంవత్సరాలు, ఎక్స్‌ సర్వీస్‌మెన్, 1984 అల్లర్ల బాధితులకు 5 సంవత్సరాల వ‌య‌స్సు సడలింపు ఉంటుంది. ఎస్సీ, ఎస్టీ, వికలాంగ అభ్యర్థులకు ₹175, ఇతర అభ్యర్థులకు ₹800 ఫీజు నిర్ణయించారు. ఈ మొత్తాన్ని ఆన్‌లైన్‌లోనే చెల్లించాలి. ఆన్‌లైన్ రాత పరీక్ష, దరఖాస్తుల స్క్రీనింగ్, అవసరమైతే గ్రూప్ డిస్కషన్, వ్యక్తిగత ఇంటర్వ్యూ ద్వారా ఎంపిక చేపడతారు. అన్ని దశలలోని ప్రదర్శన ఆధారంగా తుది మెరిట్ జాబితా రూపొందిస్తారు.

అప్లై చేయ‌డం ఇలా..

అభ్యర్థులు యూసీఓ బ్యాంక్ అధికారిక వెబ్‌సైట్‌లోకి వెళ్లి కెరీర్స్ లేదా రిక్రూట్‌మెంట్ విభాగంలో ఆన్‌లైన్ ద్వారా దరఖాస్తు చేయాలి. ఫోటో, సంతకం, అవసరమైన సర్టిఫికెట్లను అప్‌లోడ్ చేసి ఫీజు చెల్లించిన తర్వాత దరఖాస్తు ప్రతిని భద్రపరుచుకోవాలి. ఒక అభ్యర్థి ఒక్క దరఖాస్తు మాత్రమే చేయాలి. ఒకసారి సమర్పించిన తర్వాత మార్పులు చేయడానికి అవకాశం ఉండదు. చివరి తేదీకి ముందే దరఖాస్తు చేయాలని బ్యాంక్ సూచించింది.