ఘుమ‌ఘుమ‌లాడే గుత్తి వంకాయ బిర్యానీ.. చేసుకోవడం ఎలాగంటే ?

గుత్తి వంకాయ‌ల‌తో స‌హ‌జంగానే చాలా మంది కుర్మా చేసుకుంటారు. కొంద‌రు వాటిని ట‌మాటాల‌తో క‌లిపి వండుతారు. అయితే నిజానికి ఆ వంకాయ‌ల‌తో బిర్యానీ చేసుకుని తింటే రుచి అదిరిపోతుంది. చికెన్ బిర్యానీ స్టైల్‌లో దాన్ని చేసుకోవ‌చ్చు. ఈ క్ర‌మంలోనే గుత్తి వంకాయ బిర్యానీని ఎలా త‌యారు చేయాలో ఇప్పుడు తెలుసుకుందాం.

గుత్తి వంకాయ బిర్యానీని త‌యారు చేసే విధానం

మసాలా కోసం అల్లం, వెల్లుల్లి, దాల్చిన చెక్క, యాలక్కాయలు, అనాస పువ్వు, లవంగాలు, ధనియాలు, బిర్యానీ ఆకు, మిరియాల‌ను గ్రైండ్ చేసుకోవాలి. రెండు గ్లాసుల బాస్మతి బియ్యం కడిగి ప‌క్కన ఉంచుకుని, ఒక గిన్నెలో నాలుగు గ్లాసుల నీళ్లు పోసి అందులో ఆరు లవంగాలు, నాలుగు యాలక్కాయాలు, రెండు బిర్యానీ ఆకులు, అల్లం వెల్లుల్లి ముద్ద, దాల్చిన చెక్క, షా జీరా, కొద్దిగా ఉప్పు, కొద్దిగా నెయ్యి లేదా నూనె వేయాలి.

బాగా కాగాక బాస్మతి బియ్యం వేసి 3/4 వంతు ఉడికాక చిల్లుల గిన్నెలోకి వంచాలి. బిర్యానీ వండే గిన్నె కింద మట్టు వంపు లేని సమంగా ఉండేది బాగుంటుంది. మట్టు కింద పల్చగా వుంటే కింద పెనం పెట్టు కోవచ్చు. కోసిన వంకాయలలో కొంచెం కొంచెం మసాలా పెట్టి మూకుడు లో నూనె పోసి కాగాక వంకాయలు వేసి నెమ్మదిగా కొద్దిగా వేపాలి. బిర్యానీ వండాల్సిన గిన్నెలో కొద్దిగా నెయ్యి వేసి కొన్ని వేగిన వంకాయలు, మసాలా, పుదీనా, కొత్తిమీర, కొద్దిగా వేపి ఉల్లి పాయ ముక్క‌లు వేసి ఉడికిన అన్నం కొద్దిగా పరచాలి. తరువాత మిగిలిన వంకాయలు మసాలా వేసి పుదీనా, కొత్తిమీర, ఉల్లి ముక్క‌లు వేయాలి. కొద్దిగా నెయ్యి పైన అంతా వేయాలి. సరిపోయే మూతని పెట్టి బరువుగా ఉండే కల్వం పెడితే గోధుమ పిండితో మూత మూయ‌నవసరం ఉండదు. గ్యాస్‌ సిమ్ లో 20 నిమిషాలు ఉంచితే గుత్తి వంకాయ బిర్యాని రెడీ అవుతుంది.