‘కిల్లర్’ మిల్లర్ ఇప్పుడు విలన్ అయ్యాడా? డీసీ ఓటమిపై సునీల్ గవాస్కర్ సంచలన విశ్లేషణ..

ప్రస్తుతం దక్షిణాఫ్రికా క్రికెటర్ డేవిడ్ మిల్లర్ పరిస్థితి క్లిష్టంగా మారింది. ఇండియన్ ప్రీమియర్ లీగ్ (IPL)లో డిల్లీ క్యాపిటల్స్‌కు హీరోగా నిలవాల్సిన మిల్లర్, గుజరాత్ టైటాన్స్‌తో జరిగిన మ్యాచ్‌లో చివరి రెండు బంతుల్లో తీసుకున్న నిర్ణయంతో విలన్‌గా మారిపోయాడు. మ్యాచ్ చివరి ముందు బంతిపై సింగిల్ తీసేందుకు నిరాకరించిన మిల్లర్ నిర్ణయం, చివరికి జట్టుకు చేదు అనుభవాన్ని మిగిల్చింది. డీసీ జట్టు కేవలం ఒక పరుగుతో మ్యాచ్‌ను కోల్పోయింది. అయితే భారత క్రికెట్‌ దిగ్గజం సునీల్ గవాస్కర్ మాత్రం మిల్లర్ నిర్ణయాన్ని పూర్తిగా తప్పుపట్టలేదు. చివరి బంతిపై కనీసం రెండు పరుగులు సాధిస్తాననే నమ్మకంతోనే మిల్లర్ ఆ నిర్ణయం తీసుకున్నాడని ఆయన అభిప్రాయపడ్డారు. పిచ్ మరోవైపు కుల్దీప్ యాదవ్ ఉన్నప్పటికీ, మ్యాచ్ గెలవడానికి చివరి రెండు బంతుల్లో రెండు పరుగులు అవసరమని తెలిసినా, మిల్లర్ అతనికి స్ట్రైక్ ఇవ్వలేదు. చివరి బంతిని ప్రసిద్ధ్ కృష్ణ అద్భుతంగా బౌల్ చేయడంతో మిల్లర్ దాన్ని సరిగా ఆడలేకపోయాడు. సింగిల్ తీసేందుకు ప్రయత్నించిన సమయంలో జోస్ బట్లర్ కుల్దీప్ యాదవ్‌ను రన్ అవుట్ చేయడంతో, గుజరాత్ టైటాన్స్ తమ తొలి విజయాన్ని నమోదు చేసింది.

మిల్ల‌ర్ నిర్ణ‌యాన్ని త‌ప్పు ప‌ట్ట‌లేం: గ‌వాస్క‌ర్‌

ఈ విష‌యంపై గవాస్కర్ మాట్లాడుతూ, “మిల్లర్ తనపై నమ్మకం ఉంచుకుని విజయం సాధించాలని ప్రయత్నించాడు. కానీ కుల్దీప్ యాదవ్ మొదటి బంతిని సింగిల్‌గా మార్చిన విధానాన్ని చూసి, రెండో చివరి బంతిపై అతనికి స్ట్రైక్ ఇవ్వాల్సింది,” అని తెలిపారు. “ఇది మ్యాచ్ తర్వాత చెప్పడం సులభం. కానీ గత ఓవర్‌లో, ఆ ఓవర్‌లో అతను బాగా ఆడిన తీరు చూస్తే, తానే మ్యాచ్‌ను ముగిస్తాననే విశ్వాసం అతనికి ఉంది. అందువల్ల అతనిని తప్పుపట్టలేం. ప్రసిద్ధ్ కృష్ణ వేసిన చివరి బంతి అద్భుతంగా ఉండటం వల్లే అతని ప్రణాళిక సఫలం కాలేదు,” అని ఆయన అన్నారు.

చివ‌రి బంతికి ఒక పరుగైనా రాదా అనుకుని..

ఇక ఇంగ్లాండ్ మాజీ కెప్టెన్ కెవిన్ పీటర్సన్ కూడా ఈ అంశంపై తన అభిప్రాయాన్ని వెల్లడించారు. చివరి బంతిపై కనీసం ఒక పరుగైనా సాధిస్తాననే నమ్మకంతోనే మిల్లర్ కుల్దీప్‌కు స్ట్రైక్ ఇవ్వలేదని ఆయన చెప్పారు. “మిల్లర్ ఆఖరి బంతిపై కనీసం ఒక పరుగును క‌చ్చితంగా సాధిస్తానని భావించాడు. లేదంటే బౌండరీ కొడతాననే నమ్మకం కూడా అతనికి ఉంది. అందుకే అతని ఆలోచన ఆ దిశలోనే ఉంది. కుల్దీప్‌ను రిస్క్ చేయాలా లేదా అనే సందేహంలో అతను ఆ నిర్ణయం తీసుకున్నాడు,” అని పీటర్సన్ అన్నారు. “అతను ఆఖరి బంతిపై తప్పకుండా ఒక పరుగైనా తీస్తానని భావించాడు. అత్యంత చెడు పరిస్థితిలో ఒక పరుగైనా వస్తుందని, ఉత్తమ పరిస్థితిలో రెండు, మూడు లేదా సిక్స్ కూడా కొట్టవచ్చని అతను భావించాడు. అదే అతని ఆలోచన,” అని పీటర్సన్ వివరించారు. అయితే మ్యాచ్ అనంత‌రం మిల్ల‌ర్ తీవ్ర భావోద్వేగానికి గుర‌య్యాడు. జ‌ట్టు స‌భ్యులు, కెప్టెన్ ఓదార్చినా అత‌ని ముఖంలో తీవ్ర‌మైన బాధ క‌నిపించింది. త‌రువాత డ్రెస్సింగ్ రూమ్‌లోనూ అత‌ను తీవ్ర మ‌న‌స్థాపానికి గురై క‌నిపించాడు.