కరకరలాడే ఆనియన్ రింగ్స్ ఎలా తయారు చేసుకోవాలో తెలుసా?

సాయంత్రం సమయంలో వర్షం పడుతుంటే వేడివేడి కాఫీ తో పాటు ఏవైనా స్నాక్స్ ఉంటే ఎంతో అద్భుతంగా ఉంటుంది. మరి ఈ వర్షాకాలంలో చల్లచల్లని సాయంత్రాల్లో వేడివేడిగా కరకరలాడే ఆనియన్ రింగ్స్ ఎంతో అద్భుతమైన రుచిని కలిగి ఉంటాయి. మరి ఆనియన్ రింగ్స్ ఎలా తయారు చేయాలో ఇక్కడ తెలుసుకుందాం.

కావలసిన పదార్థాలు

*ఉల్లిపాయలు 5 (రింగులుగా కత్తిరించుకోవాలి)

*కారం టేబుల్ స్పూన్

*ఉప్పు తగినంత

*మైదాపిండి ఒకటిన్నర కప్పు

*నూనె డీప్ ఫ్రైకి సరిపడినంత

*మిరియాలపొడి టీ స్పూన్

*ఆవాల పొడి టీ స్పూన్

*బ్రెడ్ పౌడర్ అర కప్పు

*చిల్లీ ఫ్లేక్స్ అర కప్పు

తయారీ విధానం

ముందుగా ఉల్లిపాయలను విడివిడిగా రింగులు మాదిరిగా కట్ చేసి పెట్టుకొని ఒక 10 నిమిషాల పాటు నీటిలో నానబెట్టాలి. పది నిమిషాల తర్వాత నీటిలో నుంచి తీసేసి తడి ఆరనివ్వాలి. తరువాత ఒక గిన్నెలోకి మైదాపిండి, ఉప్పు, కారం, మిరియాల పొడి, ఆవాల పొడి, వేసి బాగా కలిపి పెట్టుకోవాలి. ఈ మిశ్రమాన్ని మరీ పలుచగా కాకుండా ఉండలు లేకుండా కలిపి పెట్టుకోవాలి. ఇప్పుడు మరొక ప్లేట్లో బ్రెడ్ పౌడర్ చిల్లీ ఫ్లేక్స్ వేసి ఉంచాలి. స్టవ్ మీద ఒక కడాయిలో నూనె పోసి బాగా వేడి చేయాలి. ఇప్పుడు ఒక్కొక్క ఉల్లిపాయ రింగును తీసుకొని పిండిలో ముంచి ఆ తర్వాత బ్రెడ్ పౌడర్ ఫ్లెక్స్ లో అటు ఇటు తిప్పుతూ నూనెలో వేయించుకుంటే ఎంతో రుచి కరమైన ఆనియన్ రింగ్స్ తయారైనట్లే. వేడి వేడిగా ఉన్న వీటిని టమోటా కెచప్ తో తింటే ఎంతో అద్భుతంగా ఉంటాయి.