RRR Movie : వార్నీ.. ఇంకా సినిమానే విడుద‌ల కాలేదు.. అప్పుడే ఓటీటీనా..!

RRR Movie : క‌రోనా నేప‌థ్యంలో అటు హిందీ చిత్ర ప‌రిశ్ర‌మ మొద‌లుకొని కింది వ‌ర‌కు అన్ని భాష‌ల‌కు చెందిన సినీ ఇండ‌స్ట్రీ వ‌ర్గాలు త‌మ మూవీల‌ను చాలా వ‌ర‌కు ఓటీటీల్లోనే విడుద‌ల చేశారు. ఈ మ‌ధ్య కాలంలో క‌రోనా ప్ర‌భావం త‌గ్గి ఆంక్ష‌ల‌ను స‌డ‌లించారు క‌నుక య‌థావిధిగా థియేట‌ర్ల‌లో సినిమాల‌ను రిలీజ్ చేసేందుకే మొగ్గు చూపుతున్నారు.

ఇక తెలుగు చిత్ర ప‌రిశ్ర‌మ‌లో చాలా సినిమాలు ఇప్ప‌టికే ఓటీటీలో సంద‌డి చేశాయి. థియేట‌ర్ల‌లో ఒక‌వేళ రిలీజ్ అయినా 35-40 రోజుల త‌రువాత ఓటీటీల్లో రిలీజ్ చేసుకునేలా ముందుగానే ఒప్పందాలు చేసుకుంటున్నారు. దీంతో సినిమా థియేట‌ర్ల‌లో వ‌చ్చిన కొద్ది రోజుల‌కు ఓటీటీకి వ‌స్తోంది. ఈ క్ర‌మంలో చాలా మంది ప్రేక్ష‌కులు థియేట‌ర్ల‌కు వెళ్ల‌డం ఎందుక‌ని ఓటీటీల్లో సినిమాల‌ను చూసేందుకే అల‌వాటు ప‌డ్డారు.

అయితే ముందు ముందు ఈ ప‌రిస్థితి ఉండ‌క‌పోయినా.. ప్రేక్ష‌కులు మాత్రం ఓటీటీల‌కు బాగానే అల‌వాటు ప‌డ్డార‌ని చెప్ప‌వ‌చ్చు. ఈ క్ర‌మంలోనే వారు కొత్త సినిమా ఏది వ‌చ్చినా స‌రే ఓటీటీలోకి ఎప్పుడు వ‌స్తుంది ? అంటూ తెలుసుకోవ‌డం మొద‌లు పెట్టారు. ఇక తాజాగా ఆర్ఆర్ఆర్ మూవీ గురించి కూడా ఈ చ‌ర్చ న‌డుస్తోంది.

ఆర్ఆర్ఆర్ మూవీకి చెందిన ట్రైల‌ర్‌ను తాజాగా లాంచ్ చేశారు. ఈ ట్రైల‌ర్ ఇప్ప‌టికే యూట్యూబ్‌లో ట్రెండ్ అవుతోంది. ఇక ఈ మూవీని జ‌న‌వ‌రి 7వ తేదీన విడుద‌ల చేయ‌నున్నారు. అందులో భాగంగానే చిత్ర యూనిట్ ముంబైలో ప్రెస్ మీట్ నిర్వ‌హించింది. అందులో భాగంగా విలేక‌రులు ఈ మూవీ ఓటీటీలోకి ఎప్పుడు వ‌స్తుంది ? అని అడిగారు. దీంతో షాకైన చిత్ర యూనిట్ త‌రువాత ఓపిగ్గానే స‌మాధానం ఇచ్చింది.

ఆర్ఆర్ఆర్ మూవీని ఎక్కువ రోజుల పాటు ప్రేక్ష‌కులు థియేట‌ర్ల‌లో చూడాల‌ని కోరుకుంటున్నామ‌ని ఆ చిత్ర యూనిట్ స‌భ్యులు తెలిపారు. ఈ క్ర‌మంలోనే ఓటీటీల్లో 90 రోజుల త‌రువాతే విడుద‌ల చేస్తామ‌ని నిర్మొహ‌మాటంగా చెప్పేశారు. దీన్ని బ‌ట్టి చూస్తే.. ఏప్రిల్ 2022లో ఆర్ఆర్ఆర్ మూవీ ఓటీటీల్లోకి వ‌స్తుంద‌ని తెలుస్తోంది. ఈ క్ర‌మంలోనే ఈ వార్త సోష‌ల్ మీడియాలో వైర‌ల్ అవుతోంది.