Lord Ganesha : ప్రతి ఒక్కరు కూడా వినాయక చవితి పండుగను ఎంతో ఘనంగా జరుపుకుంటారు. ఈ ఏడాది సెప్టెంబర్ 18న వినాయక చవితి వచ్చింది. ఆంధ్రప్రదేశ్, తెలంగాణతోపాటు మహారాష్ట్ర, గుజరాత్, కర్ణాటక వంటి రాష్ట్రాల్లో కూడా వినాయక చవితిని అంగరంగ వైభవంగా జరుపుతారు. పెద్ద పెద్ద మండపాలని ఏర్పాటు చేస్తూ ఉంటారు. అయితే వినాయకుడి పూజ చేసేటప్పుడు పొరపాటున కూడా ఈ తప్పులు చేయకండి. వినాయక చవితి పూజలో ఇవి తప్పనిసరి అని గుర్తు పెట్టుకోండి.
గణపతి విగ్రహాన్ని మండపాల్లో ఏర్పాటు చేయడానికి ఇప్పటికే అంతా రెడీ చేస్తున్నారు. పది రోజుల పాటు వినాయకుడిని ఆరాధిస్తూ ఉంటారు. వినాయక విగ్రహాన్ని చతుర్దశి రోజున.. ప్రవహిస్తున్న నదిలో నిమజ్జనం చేయడం జరుగుతుంది. సెప్టెంబర్ 18వ తేదీ మధ్యాహ్నం 12: 39 గంటల నుండి చవితి తిథి మొదలవుతుంది. సెప్టెంబర్ 19వ తేదీ రాత్రి 8 గంటలకి ముగిస్తుంది. చాంద్రమానం ప్రకారం తెలుగు వాళ్ళు గణేష్ చతుర్థిని సెప్టెంబర్ 18న జరుపుకోవాలని పండితులు చెప్పారు.
వినాయకుడికి గరిక అంటే చాలా ఇష్టం. వినాయకుడికి కచ్చితంగా గరికను పెట్టి పూజించండి. అంతా శుభమే జరుగుతుంది. వినాయకుడికి ఉండ్రాళ్ళు, కుడుములు ఇష్టం. నైవేద్యంగా ఈ రెండిటిని కచ్చితంగా పెట్టండి. ఈ రెండు పెట్టి మీరు ఇంకేమైనా నైవేద్యాలని పెట్టాలనుకుంటే పెట్టొచ్చు. కానీ ఈ రెండు అంటే మాత్రం వినాయకుడికి ఎంతో ప్రీతి.
గణేషుడి పూజలో ఎర్రని పూలను ఉపయోగించండి. ఎర్రని మందారాలు వంటివి వాడొచ్చు. ఎర్రటి గులాబీ పూలను కూడా పెట్టొచ్చు. వినాయకుడి అలంకరణలో సింధూరం కూడా ఒకటి. వినాయకుడిని పూజించేటప్పుడు సింధూర తిలకాన్ని దిద్దండి. వడపప్పు, పానకం, చలిమిడి తప్పక పెట్టండి. పూజ సమయంలో నైవేద్యంగా వీటిని వినాయకుడికి సమర్పిస్తే వినాయకుని అనుగ్రహం ఉంటుంది.
