నిత్య పూజకి ఎలాంటి విగ్రహాలను ఉపయోగించాలో తెలుసా ?

సాధారణంగా మనం రోజు ఆలయానికి వెళ్ళి పూజలు చేయలేము కనుక మన ఇంట్లోనే పూజా మందిరాన్ని ఏర్పాటు చేసుకొని ప్రతిరోజు ఉదయం సాయంత్రం పూజలు నిర్వహిస్తుంటారు. అయితే ఈ విధంగా నిత్య పూజ కోసం మన గదిలో ఎలాంటి విగ్రహాలు ఉండాలి అనే విషయంలో చాలామంది సందేహాలు వ్యక్తం చేస్తుంటారు. అయితే నిత్య పూజకు మనం ఏ విగ్రహాలను వాడాలి?ఎలాంటి విగ్రహాలు పూజ గదిలో ఉండకూడదో ఇక్కడ తెలుసుకుందాం..

దేవుడి విగ్రహాలు ఎంతో అందంగా ఉన్నాయని మార్కెట్లో దొరికే మట్టి విగ్రహాలను, చెక్కతో చేసిన విగ్రహాలను మనం నిత్య పూజ చేయడానికి ఉపయోగించకూడదు. ఇలాంటి విగ్రహాలను కేవలం పండుగ సందర్భాలలో మాత్రమే ఉపయోగించి వాటిని వెంటనే నిమజ్జనం చేయాలి. ఈ విధమైనటువంటి విగ్రహాలను నిత్యపూజ ఉపయోగించడం వల్ల వాటికి పగుళ్లు ఏర్పడతాయి. ఈ విధంగా పగుళ్లు ఏర్పడిన విగ్రహాలకు పూజలు నిర్వహించ కూడదు.

ఈ క్రమంలోనే మన ఇంట్లో నిత్యం పూజకు ఉపయోగించే విగ్రహాలు లోహంతో తయారు చేసినవి మాత్రమే ఉపయోగించాలి. అయితే ఈ విగ్రహాలు చాలా ఎత్తులో కాకుండా, చిన్న పరిమాణంలో ఉండేలా చూసుకోవాలి. వినాయకుడి ప్రతిమను రాగితో తయారు చేసినది ఇంట్లో పెట్టుకుని పూజించడం వల్ల సకల శుభాలు కలుగుతాయి. అదేవిధంగా స్పటికంతో తయారు చేసిన విగ్రహాలను ఇంట్లో పెట్టుకోవడం వల్ల శుభ ఫలితాలు కలుగుతాయి. అలాగే ఉగ్ర రూపంలో ఉండే విగ్రహాలను పూజించకూడదు.నిత్య పూజలో మనకు ఎల్లప్పుడు అభయమిస్తూ ఆశీర్వదిస్తున్న టువంటి విగ్రహాలను మాత్రమే ఉపయోగించాలని పండితులు చెబుతున్నారు.