Holy Basil Plant : తులసి మొక్క‌ను పెంచుతున్న వారు క‌చ్చితంగా ఈ నియ‌మాల‌ను పాటించాలి..!

Holy Basil Plant : ప్రతి ఒక్క ఇంట్లో కూడా తులసి మొక్క ఉండాలి. తులసి మొక్కని ప్రతి ఒక్కరూ కూడా పూజిస్తూ ఉంటారు. తులసి మొక్క లేని ఇల్లు దరిద్రంతో ఉంటుంద‌ని పండితులు అంటున్నారు. అయితే తులసి మొక్కకి ఎంతో ప్రాధాన్యత ఉంది. పురాణాల్లో శ్రీకృష్ణుడికి తులాభారం వేసినప్పుడు, ఎంతకీ తూగని శ్రీకృష్ణుడు తులసి మొక్క కాడ వేయగానే తూగుతాడు. తులసి మొక్కకి ఉన్న దైవ శక్తి అటువంటిది. హిందూ ఆచార సంప్రదాయాలలో తులసికి అత్యంత ప్రాధాన్యత ఉంది.

తులసిని ప్రత్యేకంగా కోటలో ఉంచి పూజ చేస్తారు. అయితే, తులసి మొక్కని పెంచేటప్పుడు మాత్రం కొన్ని పొరపాట్లని చేయకూడదు. ముఖ్యంగా ఎలా పడితే అలా తులసి మొక్కని పెంచకూడదని శాస్త్రం అంటోంది. కాబట్టి తులసికి సంబంధించి కొన్ని వాస్తు నియమాలను ఇప్పుడు చూసేద్దాం. ఈ పొరపాట్లు చేయకుండా చూసుకోవడం మంచిది. తులసి మొక్కని కానీ తులసి కోటని కానీ ఎప్పుడూ తూర్పు వైపు పెట్టడం మంచిది.

ఉత్తరంలో కానీ, ఈశాన్య దిక్కున కానీ పెట్టుకోవచ్చు. ఈ దిక్కుల్లో ఉంటే, అంతా మంచి జరుగుతుంది. మీకు శుభం కలుగుతుంది. తులసి మొక్క పెట్టిన చోట, శుభ్రంగా ఉండాలి. బాగా కాంతి వచ్చేటట్టు ఉండాలి. చీకట్లో ఉండకూడదు. అలా ఉంటే ఇంటికి దరిద్రం. దుమ్ము ఉన్నచోటని కూడా తులసి మొక్కని పెట్టకూడదు. తులసి మొక్కని పెట్టినప్పుడు, కాస్త ఎత్తైన ప్రదేశంలో పెట్టాలి. అంటే ఏదైనా కుండీలో కానీ తులసికోటలో కానీ మీరు పెట్టుకోవచ్చు.

తులసి మొక్కకి కచ్చితంగా రోజు నీళ్లు పొయ్యాలి. తులసి ఎంత ఆరోగ్యంగా ఉంటే అంత పాజిటివ్ ఎనర్జీని ఇంటికి తీసుకువస్తుంది. దాంతో కుటుంబ సభ్యులందరికీ అదృష్టం కలుగుతుంది. తులసి మొక్క దగ్గర రోజు పూజ చేయడం మంచిది. కొంతమంది తులసి కోట చుట్టూ ప్రదక్షిణలు చేస్తారు. అలానే ఇంకొందరు దీపారాధన చేస్తూ ఉంటారు. ఇలా తులసి దగ్గర ఏ పూజలు చేసినా కూడా అభివృద్ధికి అది సహాయపడుతుంది. కాబట్టి ఈ విధంగా పాటిస్తూ ఉండండి. అప్పుడు కష్టాలు ఏమీ ఉండవు. సంతోషంగా ఉండొచ్చు.