మహిళలపై దేశంలో రోజు రోజుకీ వేధింపులు పెరిగిపోతున్నాయి. కొందరు శాడిస్టు భర్తలు చిన్న విషయాలకే తమ భార్యలపై దాడి చేస్తున్నారు. కొందరైతే ఏకంగా తమ భార్యలను హతమారుస్తున్నారు. మధ్యప్రదేశ్ లోనూ సరిగ్గా ఇలాంటిదే ఓ సంఘటన చోటు చేసుకుంది. వివరాల్లోకి వెళితే..
మధ్యప్రదేశ్ లోని భోపాల్లో ఉన్న గౌతమ్ నగర్కు చెందిన సమీర్, షబ్నమ్ ఖాన్ (35)లు దంపతులు. వీరికి ఇద్దరు పిల్లలు ఉన్నారు. షబ్నమ్ ఇంటికి సమీపంలోనే ఆమె తల్లిదండ్రులు నివాసం ఉంటున్నారు. అయితే ఆమె పుట్టింటికి వెళ్లే విషయమై భర్తను అడిగింది. కానీ అందుకు సమీర్ ఒప్పుకోలేదు.
ఈ క్రమంలోనే భార్యా భర్త మధ్య గొడవ పెరిగింది. దీంతో ఆగ్రహంతో ఊగిపోయిన సమీర్ రాత్రి 11 గంటల సమయంలో భార్యపై కిరోసిన్ పోసి నిప్పు పెట్టాడు. అనంతరం అతను ఇంటి నుంచి పారిపోయాడు.
తరువాత ఆమె పెద్దగా కేకలు వేయడంతో నిద్ర లేచిన ఆమె పెద్ద కుమారుడు ఇరుగు పొరుగు వారికి, తన అమ్మమ్మ, తాతలకు సమాచారం ఇచ్చాడు. దీంతో వారు అక్కడికి చేరుకుని తమ కుమార్తెను హాస్పిటల్కు తరలించారు. ఆమె పరిస్థితి ప్రస్తుతం 35 శాతం కాలిన గాయాలతో అత్యంత విషమంగా ఉంది. ఈ మేరకు సమీర్పై కేసు నమోదు చేసిన పోలీసులు అతని కోసం గాలిస్తున్నారు.
