అనుమానం పెనుభూతం లాంటిది. ఒక్కసారి ఎవరికైనా అనుమానం కలిగిందంటే ఆ అనుమానం ఎన్నో పరిణామాలకు దారితీస్తుంది. ముఖ్యంగా ఇలాంటి అనుమానం భార్యాభర్తల మధ్య తలెత్తితే వారి సంసార జీవితంలో ఎన్నో ఒడిదుడుకులు ఏర్పడతాయి. ఇలాంటి అనుమానం వల్ల ఎంతో మంది భర్తలు భార్యలను చంపిన ఘటనలు కూడా ఉన్నాయి. తాజాగా ఇలాంటి ఘటన సంగారెడ్డి జిల్లాలో చోటు చేసుకుంది.
చిట్కుల్ గ్రామానికి చెందిన మెఘవేలు రాజేశ్వరి అనే దంపతులు రాళ్లు కొడుతూ జీవనం సాగించేవారు. ఈ దంపతులకు ఐదు సంవత్సరాల కుమారుడు కూడా ఉన్నాడు. అయితే రాజేశ్వరి తరచూ తన కుటుంబ సభ్యులతోపాటు ఇతరులతో ఫోన్ లో ఎక్కువగా మాట్లాడుతూ కనిపించింది. ఈ క్రమంలోనే తన భర్త మేఘ వేలు తన భార్య ఎవరితోనో అక్రమ సంబంధం పెట్టుకుందని అనుమాన పడ్డాడు. ఈ క్రమంలోనే అతను ఆమెపై అనుమాన పడుతూ చిత్రహింసలకు గురి చేసేవాడు.
రోజు రోజుకూ రాజేశ్వరి ఫోన్ లో మాట్లాడటం గమనిస్తున్న మేఘవేలుకి తన భార్య రాజేశ్వరిపై అనుమానం పెరిగింది. ఈ క్రమంలోనే వీరిద్దరూ గొడవ పడ్డారు. ఆ రోజు రాత్రి నిద్రిస్తున్న రాజేశ్వరిపై తన భర్త ఎంతో ఆగ్రహం వ్యక్తం చేస్తూ బండలు కొట్టే సుత్తితో తలపై దారుణంగా కొట్టాడు. దీంతో రాజేశ్వరి రక్తపుమడుగులో కొట్టుమిట్టాడుతూ అక్కడికక్కడే మృతి చెందింది. అయితే అతను ఆ సుత్తిని తీసుకొని నేరుగా పోలీస్ స్టేషన్ కి వెళ్లి లొంగిపోయాడు.
