ఆ షోలో భాగంగా ఒకే చోట చేరి సందడి చేస్తున్న తమన్నా.. విజయ్ సేతుపతి..

మిల్క్ బ్యూటీగా ఎంతో పేరు సంపాదించుకున్న తమన్నా ప్రస్తుతం వరుస అవకాశాలతో దూసుకు పోతున్నారు. ఈ క్రమంలోనే అటు వెండి తెర వైపు మాత్రమే కాకుండా ఇటు ఓటీటీల్లో అవకాశాలను కొల్లగొడుతూ ఎంతో బిజీగా ఉన్న ఈ బ్యూటీ బుల్లితెరపై సందడి చేయడానికి సిద్ధమైంది. ఈ క్రమంలోనే ఆమె షేర్ చేసిన ఫోటో, తెలిపిన సమాచారం పెద్ద ఎత్తున నెటిజన్లను ఆకట్టుకుంటున్నాయి.

తమిళ స్టార్ హీరో విజయ్ సేతుపతితో కలిసి తమన్నా దిగిన ఫోటోను షేర్ చేస్తూ ఇది ఒక కుకింగ్ షో, ఇంకా షూటింగ్ ప్రారంభం కాకనే ఈ విధంగా ఎంజాయ్ చేశామంటూ తమన్నా షేర్ చేసిన ఫోటో ప్రస్తుతం సోషల్ మీడియాలో వైరల్ అయింది. ఈ ఫోటోలో విజయ్ లుక్ అభిమానులను ఎంతగానో ఆకట్టుకుంది. బుల్లితెరపై తమన్నా హోస్ట్ గా ఓ కుకింగ్ ప్రోగ్రాం రాబోతుంది అనే విషయం మనకు తెలిసిందే.

మాస్టర్ చెఫ్‌ అంటూ జెమినీ టీవీలో ప్రసారమయ్యే ఈ కార్యక్రమానికి సంబంధించిన ప్రోమో షూటింగ్ కార్యక్రమంలో భాగంగా విజయ్ సేతుపతి, తమన్నా ఒకే చోట చేరి సందడి చేసినట్లు తెలుస్తోంది. సినిమాల పరంగా తీరిక క్షణం లేకుండా ఉండే విజయ్ సేతుపతి ఈ విధంగా ఓ వంటల ప్రోగ్రామ్ కి రావడంతో అందరిలోనూ ఆసక్తి నెలకొంది. మొత్తానికి వీరిద్దరూ కలిసి చేసే ప్రోమో ప్రేక్షకులను ఏ విధంగా ఆకట్టుకుంటుందో వేచి చూడాలి.