Bee Farming: స్వచ్ఛమైన తేనె మనకు మార్కెట్లో లభించడం చాలా తక్కువ. ప్యాక్ చేయబడిన తేనె లభిస్తుంది. అయితే తేనెటీగలను పెంచుతూ స్వచ్ఛమైన తేనెను ఉత్పత్తి చేస్తే నిజానికి వ్యాపారం బాగానే సాగుతుంది. స్వచ్ఛమైన తేనెకు మార్కెట్లో డిమాండ్ ఎక్కువే. అందువల్ల తేనెటీగల పెంపకం ద్వారా మనం నెల నెలా బాగానే ఆదాయాన్ని సంపాదించవచ్చు.
తేనెటీగలను పెంచేందుకు పూలతోటలు ఉండాలి. పూలతోటలు దగ్గర్లో ఉండేలా చూసుకుంటే మంచిది. దీంతో తేనెటీగలు వేగంగా తేనెను సేకరిస్తాయి. ఇక పువ్వులు అన్నీ మనకు ఏడాది పొడవునా అందుబాటులో ఉండవు. కనుక ఈ విషయాన్ని కూడా గుర్తుంచుకోవాలి. పువ్వులు ఏడాది పొడవునా లభించే ప్రాంతాల్లో తేనెటీగలను పెంచాలి. దీంతో తేనె సేకరణకు ఆటంకం ఏర్పడదు.
తేనెటీగలను బాక్సుల్లో పెంచాల్సి ఉంటుంది. ఒక్కో బాక్సుకు సుమారుగా రూ.1000 వరకు ఖర్చు అవుతుంది. ఈ క్రమంలో 50 నుంచి 100 బాక్సులతో మొదట తేనెటీగల పెంపకం చేపట్టవచ్చు. 100 బాక్సులు అయితే ఒక్కో బాక్సుకు రూ.1000 చొప్పున మొత్తం రూ.1 లక్ష పెట్టుబడి అవుతుంది. పువ్వుల తోటలు ఉండే స్థలాన్ని లీజుకు తీసుకోవచ్చు. దీంతో తేనె సేకరణ సులభతరం అవుతుంది. అలాగే ఇతర పరికరాలకు, సామగ్రికి డబ్బులను వెచ్చించాలి. దీంతో రూ.2 లక్షల మేర పెట్టుబడి పెడితే తేనెటీగల పెంపకాన్ని ప్రారంభించవచ్చు.
తేనెటీగలు సహజంగానే ఒక బాక్సులో తేనెను సేకరించేందుకు సుమారుగా 20 రోజులకు పైగానే సమయం పడుతుంది. అంటే నెల నెలా మనకు తేనె కచ్చితంగా వస్తుంది. ఈ క్రమంలో ఒక్క బాక్సు నుంచి నెలకు సుమారుగా 5 కేజీల వరకు తేనె ఉత్పత్తి అవుతుంది. అదే 100 బాక్సులకు అయితే 500 కేజీల తేనె వస్తుంది.
బయట మనం కిలో తేనెను టోకున అమ్మితే రూ.100 నుంచి రూ.150 వరకు వస్తాయి. కానీ మనమే తేనెను ప్యాక్ చేసి అమ్మితే కేజీకి రూ.400 వరకు సంపాదించవచ్చు. దీంతో 500 కేజీల తేనెకు కిలోకు రూ.400 వేసుకున్నా.. రూ.2,00,000 వస్తాయి. అందులో సగం ఖర్చులు తీసినా సగం మిలుగుతాయి. అంటే రూ.1 లక్ష అన్నమాట. నెలకు ఇలా రూ.1 లక్ష ఆదాయం పొందవచ్చు.
గమనిక: తేనెటీగల పెంపకంపై కేవలం సంక్షిప్త అవగాహన కోసమే ఈ సమాచారం ఇవ్వడం జరిగింది. పూర్తి వివరాల కోసం తేనెటీగల పెంపకం శిక్షణా కేంద్రంలో సంప్రదించవచ్చు. ఈ కేంద్రాలు తెలుగు రాష్ట్రాల్లో అనేక చోట్ల ఉన్నాయి.
