హిందూ సాంప్రదాయాల ప్రకారం పెళ్లి అంటే ఎంతో సంప్రదాయబద్ధంగా జరిగే వేడుక. ఈ వేడుక ద్వారా రెండు జీవితాలూ ఒకటవుతాయి. ప్రతి మనిషి జీవితంలో ఎంతో పవిత్రమైన ఈ పెళ్లి వేడుకను చాలా సాంప్రదాయబద్దంగా, వేదమంత్రాల నడుమ పంచభూతాల సాక్షిగా పండితులు పెళ్లి తంతు కార్యక్రమాన్ని జరిపిస్తారు. అయితే నేటి తరం యువత సాంప్రదాయానికన్నాపెళ్లిలో ఫోటోలు, వీడియోలకు అధిక ప్రాధాన్యత ఇవ్వడం వల్ల సాంప్రదాయాలు, ఆచారాలు మంట కలిసిపోతున్నాయి. ముఖ్యంగా పెళ్లిలో కొన్ని పొరపాట్లు చేయటం వల్ల.. ఎన్నో ఇబ్బందులను ఎదుర్కోవాల్సి వస్తుందని పండితులు తెలియజేస్తున్నారు. మరి పెళ్లిలో ఏ విధమైనటువంటి పొరపాట్లను చేయకూడదనే విషయాలను ఇక్కడ తెలుసుకుందామా..!
పెళ్లిలో అత్యంత ముఖ్యమైన సమయం మాంగళ్యధారణ. మాంగళ్యధారణ సరైన ముహూర్తానికి జరగకపోతే భార్యాభర్తల మధ్య తీవ్ర మనస్పర్ధలు, గొడవలు తలెత్తుతాయి. తలంబ్రాలకు బదులు థర్మోకోల్ వాడటం వల్ల బంధు ద్వేషం పెరుగుతుంది. పెళ్లికి వచ్చిన అతిథులు మండపంపైకి చెప్పులు వేసుకుని వెళ్లడం వల్ల మండపంలో ఉన్న దేవతలు వెళ్లిపోతారని ఆ దంపతుల జీవితంలో కష్టాలు ఎదురవుతాయని పండితులు చెబుతున్నారు.
అయితే ప్రస్తుతం పెళ్లిళ్లలో చెప్పులు వేసుకుని వెళ్లడం ఒక ఫ్యాషనైపోయింది. పురోహితుల నుంచి వేదమంత్రాలు రావాల్సిన చోట సెల్ ఫోన్లు, మైకులలో మంత్రాలు వినిపిస్తూ మన సాంప్రదాయాలను తుంగలో తొక్కుతున్నారు. ఇలా ఎంతో సాంప్రదాయబద్ధంగా వేడుకగా జరుపుకునే ఈ పెళ్లి కార్యక్రమంలో ఇలాంటి పొరపాట్లు చేయకూడదని పండితులు తెలియజేస్తున్నారు.
