భారత్లో నిర్వహించిన భారీ స్థాయి ఆరోగ్య అధ్యయనంలో పాల్గొన్న వారిలో దాదాపు 40 శాతం మంది మెటబాలిక్-డిస్ఫంక్షన్-అసోసియేటెడ్ స్టియాటోటిక్ లివర్ డిసీజ్ (MASLD) బారిన పడే ప్రమాదంలో ఉన్నారని తాజా పరిశోధన వెల్లడించింది. ఈ అధ్యయనం The Lancet Regional Health Southeast Asia జర్నల్లో ప్రచురితమైంది. ఈ పరిశోధనలో Council of Scientific and Industrial Research (CSIR) కు చెందిన 37 ల్యాబొరేటరీల నుంచి దేశవ్యాప్తంగా 27 నగరాల్లో ఉన్న 7,700 మందికి పైగా వయోజనులను పరిశీలించారు. వీరిలో శాశ్వత సిబ్బంది, ఉద్యోగులు, పదవీ విరమణ పొందినవారు, వారి జీవిత భాగస్వాములు కూడా ఉన్నారు. MASLD ఉన్నవారిలో కాలేయ గట్టితనం (లివర్ స్టిఫ్నెస్) రూపంలో కనిపించే గణనీయమైన ఫైబ్రోసిస్ సమస్య, MASLD లేనివారితో పోలిస్తే ఎక్కువగా ఉన్నట్లు గుర్తించారు.
35 నుంచి 40 ఏళ్ల లోపు ఉన్నవారిలో..
ఈ అధ్యయనాన్ని CSIR-Institute of Genomics and Integrative Biology సహా పలు CSIR సంస్థలకు చెందిన శాస్త్రవేత్తలు నిర్వహించారు. వయస్సును సరిచూసిన తర్వాత, గణనీయమైన లివర్ ఫైబ్రోసిస్ ప్రాబల్యత 2.4 శాతంగా ఉందని వారు తెలిపారు. ముఖ్యంగా 60 ఏళ్లు పైబడిన వృద్ధుల్లో, అలాగే డయాబెటిస్ లేదా తీవ్రమైన స్థూలకాయం (BMI 35 నుంచి 40 లోపు) ఉన్నవారిలో ఈ సమస్య ఎక్కువగా కేంద్రీకృతమై ఉందని వెల్లడించారు. ఫీనోమ్ ఇండియా ప్రాజెక్టు దేశవ్యాప్తంగా దీర్ఘకాలికంగా నిర్వహిస్తున్న అధ్యయనంలో భాగంగా గుండె-మెటబాలిక్ వ్యాధులు, ముఖ్యంగా డయాబెటిస్, కాలేయ రుగ్మతలు, హృదయ వ్యాధులను ముందుగానే అంచనా వేసే మెరుగైన నమూనాను అభివృద్ధి చేయడం దీని లక్ష్యమని Ministry of Science and Technology జూన్ 3, 2024న విడుదల చేసిన ప్రకటనలో పేర్కొంది. ఈ ప్రాజెక్టులో ఇప్పటికే 10వేలకు పైగా నమూనాల సేకరణ పూర్తైంది.
అధిక బరువే ప్రధాన కారణం..
పరీక్షించిన 10,267 మందిలో 7,764 మందిని అధ్యయనంలో చేర్చగా, అందులో 3,712 మంది (47.8 శాతం) MASLD ప్రమాణాలను పూర్తి చేశారు. వయస్సును సరిచూసిన తర్వాత ప్రాబల్యత 38.9 శాతంగా నమోదైందని పరిశోధకులు తెలిపారు. MASLD బారిన పడినవారిలో అధిక బరువు, స్థూలకాయం, గణనీయమైన కాలేయ ఫైబ్రోసిస్, అధిక HbA1c స్థాయిలు (గత 2-3 నెలల సగటు రక్తంలో చక్కెర స్థాయి), అలాగే డిస్లిపిడీమియా ఎక్కువగా ఉన్నట్లు అధ్యయనం స్పష్టం చేసింది. MASLDకు స్థూలకాయం అత్యంత బలమైన ప్రమాదకారకంగా గుర్తించగా, డయాబెటిస్, డిస్లిపిడీమియా, అధిక రక్తపోటు ఈ ప్రమాదాన్ని మరింత పెంచుతున్నాయని శాస్త్రవేత్తలు పేర్కొన్నారు.
నగరాల వారిగా చూస్తే..
భౌగోళికంగా చూస్తే MASLD ప్రాబల్యతలో భారీ తేడాలు కనిపించాయి. కేరళలోని తిరువనంతపురంలో 27 శాతంగా ఉండగా, ఉత్తరాఖండ్లోని రూర్కీ, మధ్యప్రదేశ్లోని భోపాల్లో దాదాపు 50 శాతానికి చేరింది. ఢిల్లీ, బెంగళూరు, పూణె, హైదరాబాద్, చెన్నై వంటి ప్రధాన మెట్రో నగరాల్లో మధ్యస్థ స్థాయి ప్రాబల్యత నమోదైనట్లు అధ్యయనం తెలిపింది. భారత్లో MASLD , లివర్ ఫైబ్రోసిస్ అధికంగా ఉండటం ఒక తీవ్ర ప్రజారోగ్య సవాల్ అని పరిశోధకులు హెచ్చరించారు. అసోం వంటి కొన్ని ప్రాంతాల్లో ఫైబ్రోసిస్ ఎక్కువగా ఉండటం, వృద్ధులు, డయాబెటిస్ లేదా స్థూలకాయం ఉన్నవారు ఎక్కువగా ప్రభావితమవడం వంటి అంశాలు ప్రత్యేక ఆందోళన కలిగిస్తున్నాయని తెలిపారు. ఈ ఫలితాలు దేశవ్యాప్తంగా లక్ష్యిత ప్రజారోగ్య చర్యలు తీసుకునేందుకు కీలక ఆధారాలు అందిస్తున్నాయని వారు పేర్కొన్నారు.
