Srikanth : తెలుగు సినీ ప్రేక్షకులకు నటుడు శ్రీకాంత్ గురించి ప్రత్యేకంగా చెప్పాల్సిన పనిలేదు. ఈయన ఎన్నో కుటుంబ, ప్రేమ కథా చిత్రాల్లో నటించి మంచి గుర్తింపు పొందారు. కెరీర్ మొదట్లో శ్రీకాంత్ విలన్ పాత్రలలో నటించారు. ప్రస్తుతం శ్రీకాంత్ హీరోగా కాకుండా విలన్ పాత్రలు మరియు పాత్రకు ప్రాధాన్యత ఉన్న సినిమాలనే నటిస్తున్నారు. ఇక అసలు విషయానికి వెళ్తే శ్రీకాంత్ ఒకప్పుడు ఎన్టీర్, చిరంజీవి లాంటి స్టార్ హీరోల సినిమా రికార్డులను సైతం బద్దలు కొట్టారనే అనే విషయం మీకు తెలుసా..
ఆ ఒక్క చిత్రమే శ్రీకాంత్ ని ఓవర్ నైట్ లో స్టార్ హీరోగా నిలబెట్టింది. ఎలాంటి అంచనాలు లేకుండా దర్శకేంద్రుడు రాఘవేంద్రరావు దర్శకత్వంలో శ్రీకాంత్ హీరోగా తెరకెక్కిన సినిమా పెళ్లి సందడి. జనవరి 12, 1996లో ఈ సినిమా విడుదలైంది. పెళ్లి సందడి కంటే ముందు రాఘవేంద్రరావు భారీ బడ్జెట్ చిత్రాలను తెరకెక్కించారు. అయితే సల్మాన్ ఖాన్ హీరోగా నటించిన హమ్ ఆప్ కు హై కోన్ సినిమా చూసిన తరవాత రాఘవేంద్రరావు అలాంటి సినిమా చేయాలని అనుకున్నారట. వెంటనే కథా రచయిత సత్యానంద్ ను పిలిపించి తన ఆలోనలను చెప్పటం జరిగిందట. అంతేకాకుండా ఈ చిత్రంలో పాటలు కూడా కథలో భాగం అవ్వాలని రాఘవేంద్రరావు సూచించారు. ఇక సత్యానంద్ ఏఎన్ఆర్ నటించిన పెళ్లి కానుక సినిమాను ఇన్స్పిరేషన్ గా తీసుకుని పెళ్లిసందడి కథను సిద్ధం చేశారు.
కథను రాఘవేంద్రరావుకు వినిపించగా ఆయనకు కథ బాగా నచ్చింది. 80లక్షల బడ్జెట్ తో ఈ సినిమాను నిర్మించాలని భావించారు. ఈ సినిమా నిర్మించడం కోసం మొదట నిర్మాత అల్లు అరవింద్ ను సంప్రదించారట. కానీ ఆయన ఎక్కువ బడ్జెట్ అని చిన్న సినిమా కావడంతో నలుగురం కలిసి చేద్దామని చెప్పారు. అలా ఈ సినిమాను రాఘవేంద్రరావు, అశ్వినిదత్, అల్లు అరవింద్ మరో నిర్మాత భాగ్వమ్యంలో కలిసి నిర్మించారు. పెళ్లి సందడి సినిమాకి హీరోగా తాజ్ మహల్ సినిమాతో గుర్తింపు తెచ్చుకున్న శ్రీకాంత్ ను ఎంపిక చేశారు.
ఎలాంటి అంచనాలు లేకుండా జనవరి 12 1996లో సంక్రాంతి సందర్భంగా ఈ చిత్రం విడుదలై బాక్సాఫీసు వద్ద ఘన విజయాన్ని అందుకుంది. కీరవాణి అందించిన మ్యూజిక్ ఈ సినిమాకు మరో హైలెట్ అని చెప్పవచ్చు. పెళ్లి సందడి చిత్రం 44 కేంద్రాలలో 50 రోజులు, 33 కేంద్రాలలో 100 రోజులు ఆడి రికార్డులను బ్రేక్ చేసేసింది. ఇక ఎన్టీఆర్ లవకుశ సినిమా 27 కేంద్రాలలో 100రోజులు ఆడగా ఆ సినిమా రికార్డులను పెళ్లిసందడి చిత్రం బద్దలు కొట్టింది. అనేక థియేటర్లలో ఎక్కువ షోలు రన్ అయ్యి చిరంజీవి రికార్డులను కూడా బద్దలు కొట్టింది. ఇప్పటికీ ఎక్కువ షోలు ఆడిన సినిమా కూడా పెళ్లిసందడి చిత్రమే. పెళ్లి సందడి చిత్రం క్రియేట్ చేసిన రికార్డుతో హీరోగా శ్రీకాంత్ ఎంతో మంచి గుర్తింపు వచ్చింది.
