Bhimla Nayak : పవర్ స్టార్ పవన్ కళ్యాణ్, దగ్గుబాటి రానా ప్రధాన పాత్రల్లో తెరకెక్కుతున్న చిత్రం “భీమ్లా నాయక్”. సాగర్ కే చంద్ర దర్శకత్వంలో రూపొందుతున్న ఈ సినిమా జనవరి 12న విడుదలకు సిద్ధంగా ఉంది. ఈ చిత్రం మలయాళ చిత్రం “అయ్యప్పనుమ్ కోషియుమ్‌”కి రీమేక్ గా రూపొందుతుండ‌గా, ఈ చిత్రంలో పవన్ కళ్యాణ్ నిత్యా మీనన్‌తో, రానా సంయుక్తా మీనన్‌తో రొమాన్స్ చేస్తున్నారు. మాటల మాంత్రికుడు త్రివిక్రమ్ శ్రీనివాస్ కథ, స్క్రీన్ ప్లే, డైలాగ్స్ అందించిన ఈ చిత్రానికి తమన్ సంగీత దర్శకుడు.
భీమ్లా నాయక్ మూల కథ మలయాళ సినిమాదే అయినా.. త్రివిక్రమ్ శ్రీనివాస్.. పవన్ కళ్యాణ్ ఇమేజ్‌కు త‌గ్గ‌ట్టు తెలుగు నేటివిటీ ప్ర‌కారం కొన్ని మార్పులు చేర్పులు చేసుకుంటూ వ‌చ్చారు. సెట్స్‌లోకి వెళ్ల‌క ముందు ఈ సినిమాకు త్రివిక్రమ్ ముందుగా అనుకున్న టైటిల్ ‘అసుర సంధ్య వేళ‌లో..’ సాధార‌ణంగా త్రివిక్రమ్ త‌న సినిమాల‌కు ‘అ’ అనే అక్ష‌రంతో టైటిల్స్ పెడుతుంటారు. అదే సెంటిమెంటుతో ‘అసుర సంధ్య‌వేళ‌లో..’ అనే టైటిల్‌ను అనుకున్నారు.
ప‌వ‌న్‌క‌ళ్యాణ్‌కు ఉన్న మాస్ ఇమేజ్ దృష్ట్యా ఆ టైటిల్ ఆడియెన్స్‌కు అంత‌గా క‌నెక్ట్ కాదేమోన‌ని నిర్మాత‌లు భావించటంతో చివ‌ర‌కు ఆ టైటిల్‌ను ‘భీమ్లా నాయక్’గా ఖరారు చేశారు. పవర్ ఫుల్ టైటిల్‌తో ఈ సినిమాకి మంచి క్రేజ్ ద‌క్కింద‌నే చెప్పాలి. ఈ చిత్రం త‌ర్వాత క్రిష్ దర్శకత్వంలో రూపొందుతోన్న హ‌రిహ‌ర వీరమ‌ల్లు సినిమాను పవన్ పూర్తి చేయ‌డానికి రెడీ అవుతున్నారు. ఇంకా హ‌రీశ్ శంక‌ర్ దర్శకత్వంలో ఓ చిత్రం, సురేంద‌ర్ రెడ్డి దర్శకత్వంలో మ‌రో చిత్రాన్ని పవన్ కళ్యాణ్ పూర్తి చేయాల్సి ఉంది.
