Bigg Boss 5 : బిగ్ బాస్ సీజన్ 5 ప్రస్తుతం 11వ వారంలోకి అడుగుపెట్టింది. 19 మంది సభ్యులతో మొదలైన ఈ షోలో ఇప్పటికే 10 మంది బయటకు పోగా, ప్రస్తుతం హౌజ్లో 9 మంది కంటెస్టెంట్స్ మిగిలారు. వీరి మధ్య ప్రతి టాస్క్ చాలా ఆసక్తికరంగా సాగుతోంది. అయితే గత రెండు, మూడు రోజులుగా కెప్టెన్సీ కంటెండర్ టాస్క్ జరుగుతుండగా, తాజాగా మరో కొత్త గేమ్ కు తెర తీశారు. అయితే అందులో గెలిచిన వారికి ఎవిక్షన్ పాస్ దక్కుతుందని తెలిపారు.
నిప్పులే శ్వాసగా, గుండెలో ఆశగా.. పేరుతో ఈ టాస్క్ జరగనుండగా, అందులో భాగంగా హౌస్లో ఉండే ఫైర్ ఇంజన్లో బజర్ మోగగానే ఇద్దరు సభ్యులు వెళ్లి కూర్చోవాలి. వారి ఎదురుగా మంటల్లో ఇద్దరు కంటెస్టెంట్స్ ఫొటోలు ఉంటాయి. మంటల్లో ఫొటోలున్న సభ్యులు ఫైర్ ఇంజన్లో కూర్చున్న కంటెస్టెంట్స్ను ఎవిక్షన్ పాస్ కావాలని, అందుకు మంటల నుంచి తమను రక్షించాలని రిక్వెస్ట్ చేయాలి. అందుకు తగిన రీజన్ కూడా చెప్పాలి.
తాజాగా విడుదలైన ప్రోమోని బట్టి చూస్తే అందులో ముందుగా ఫైర్ ఇంజన్లో షణ్ను, సిరి స్థానం దక్కించుకున్నారు. వీరికి ఎదురుగా ఉండే మంటల్లో సన్నీ, ప్రియాంక ఫొటోలు వచ్చాయి. సన్నీ తాను ఎమోషన్స్ను కంట్రోల్ చేసుకుంటున్నానని, మారేందుకు చాలా కృషి చేస్తున్నాను కాబట్టి తనకు ఎవిక్షన్ పాస్ కావాలని రిక్వెస్ట్ చేశాడు.
అలాగే పింకీ.. తాను మానసికంగా బలవంతురాలినని, ఇకపై గేమ్లో ముందుకు సాగాలంటే తనకు ఎవిక్షన్ పాస్ కావాలంటూ రిక్వెస్ట్ చేసింది. ఇందులో ఎవరు సేవ్ అయ్యారనేది ఎపిసోడ్లో తెలుస్తుంది.
ఇక శ్రీరామ్చంద్ర, ఆనీ మాస్టర్ తర్వాతి బజర్కి ఫైర్ ఇంజన్లో స్థానం దక్కించుకున్నారు. వారికి ఎదురుగా షణ్ను, సిరి ఫొటోలు మంటల్లో ఉన్నాయి. అయితే వీళ్లిద్దరూ తమకు ప్రజలపై నమ్మకం ఉందని, వారు ఓటు వేసి తమను గెలిపించుకుంటారనే నమ్మకం ఉందని, కాబట్టి, తమకు ఎవిక్షన్ పాస్ అక్కర్లేదని అన్నారు.
