రూపే డెబిట్ కార్డు వాడుతున్నారా ? అయితే ఈ విష‌యం త‌ప్ప‌క తెలుసుకోవాలి !

మ‌న దేశంలో వీసా, మాస్ట‌ర్ కార్డ్ ఆధారిత డెబిట్‌, క్రెడిట్ కార్డుల‌ను ఎప్ప‌టి నుంచో ఉప‌యోగిస్తున్నారు. అయితే వీటిని వాడ‌డం వ‌ల్ల వినియోగ‌దారుల నుంచి వ్యాపారులు 2 శాతం ప‌న్ను వ‌సూలు చేస్తారు. ఎందుకంటే వారు ఆ మొత్తాన్ని బ్యాంకుల‌కు చెల్లించాలి. ఇక బ్యాంకులు వీసా, మాస్టర్ కార్డ్ కంపెనీల‌కు చార్జిల‌ను చెల్లిస్తారు. అందుక‌నే ఆ కార్డుల‌ను వాడిన‌ప్పుడు మ‌న నుంచి కొంద‌రు వ్యాపారులు చార్జిల‌ను వ‌సూలు చేస్తారు. అయితే రూపే విధానం భార‌త్‌కు చెందిన‌ది. అందువ‌ల్ల రూపే ఆధారిత కార్డుల‌ను వాడేట‌ప్పుడు మ‌న‌కు చార్జిలు ప‌డ‌వు. ఈ విష‌యాన్ని రూపే కార్డులు వాడేవారంద‌రూ తెలుసుకోవాలి.

ఇక రూపే డెబిట్ కార్డులు ఉన్న‌వారికి కార్డు ర‌కాన్ని బ‌ట్టి రూ.50వేల నుంచి రూ.10 ల‌క్ష‌ల వ‌ర‌కు ఇన్సూరెన్స్ ల‌భిస్తుంది. అది ఉచితంగానే వ‌స్తుంది. దాన్ని వినియోగ‌దారుడు ప్ర‌మాదం జ‌రిగిన 90 రోజుల్లోగా క్లెయిమ్ చేసుకోవ‌చ్చు. ప్ర‌మాదం వ‌ల్ల ఖాతాదారుడు మ‌ర‌ణిస్తే అత‌ని నామినీల‌కు ఇన్సూరెన్స్ వ‌స్తుంది. లేదా గాయాలు అయి వైక‌ల్యం చెందితే ఇన్సూరెన్స్ క‌వ‌రేజి ఇస్తారు. ఇలా రూపే డెబిట్ కార్డుల‌కు ఇన్సూరెన్స్ ప‌నిచేస్తుంది.

ఇక రూపే డెబిట్ కార్డుల‌తో వ‌చ్చే ఈ ఉచిత ఇన్సూరెన్స్ స‌దుపాయాన్ని పొందాలంటే ఖాతాదారులు ఆ కార్డుల‌ను ఎప్పుడూ వాడుతుండాలి. ప్ర‌మాదం జ‌రగ‌డానికి 90 రోజుల ముందు వ్య‌వ‌ధిలో ఎప్పుడైనా క‌నీసం ఒక్క‌సారి అయినా కార్డును వాడి ఉండాలి. దీంతో ఇన్సూరెన్స్ వ‌ర్తిస్తుంది. ఇక ప్ర‌మాదం జ‌రిగాక ధ్రువ‌ప‌త్రాల‌ను 60 రోజుల్లోగా స‌బ్‌మిట్ చేయాలి. దీంతో ఇన్సూరెన్స్‌ను క్లెయిమ్ చేసుకోవ‌చ్చు. ఇలా రూపే డెబిట్ కార్డు ఇన్సూరెన్స్ ప‌నిచేస్తుంది.