దారుణం.. క‌రోనా కొత్త వేరియెంట్ ఒమిక్రాన్ వ‌స్తుందేమోన‌ని.. భార్య‌, పిల్ల‌ల‌ను హ‌త‌మార్చాడు..

అత‌ను ఎంతో చ‌దువుకున్నాడు.. ఫోరెన్సిక్ ప్రొఫెస‌ర్‌గా కూడా ప‌నిచేస్తున్నాడు.. కానీ అత‌ని మ‌తిస్థిమితం స‌రిగ్గా లేదు. దీంతో అత‌ను క‌రోనా వ‌స్తుందేమోన‌న్న భ‌యంతో క‌ట్టుకున్న భార్య‌ను, క‌న్న పిల్ల‌ల‌ను అతి దారుణంగా చంపేశాడు. ఈ సంఘ‌ట‌న ఉత్త‌ర‌ప్ర‌దేశ్ లో చోటు చేసుకుంది. వివ‌రాల్లోకి వెళితే..

కాన్‌పూర్‌లోని క‌ల్యాణ్‌పూర్ అనే ప్రాంతంలో నివాసం ఉండే ఓ వ్య‌క్తి ఫోరెన్సిక్ ప్రొఫెస‌ర్‌గా ప‌నిచేస్తున్నాడు. అయితే అత‌ను క‌రోనా కొత్త వేరియెంట్ వ‌స్తుందేమోన‌ని భ‌య‌ప‌డి భార్య గొంతుకు తీగ‌ను బిగించి ఊపిరాడ‌కుండా చేసి చంపేశాడు. త‌రువాత సుత్తితో త‌న ఇద్ద‌రు పిల్ల‌ల త‌ల‌ల‌పై బ‌లంగా మోది హ‌త్య చేశాడు. అనంత‌రం త‌న ఇంటి నుంచి పారిపోయాడు.

అలా అత‌ను పారిపోతూ త‌న సోద‌రుడికి వాట్సాప్‌లో మెసేజ్ చేశాడు. క‌రోనా కొత్త వేరియెంట్ ఒమిక్రాన్ వ్యాప్తి చెందుతుంద‌ని, అది ప్ర‌పంచంలో ఎవ‌రినీ విడిచిపెట్ట‌ద‌ని, అంద‌రినీ చంపుతుంద‌ని, అందుక‌నే దాన్నుంచి అంద‌రికీ విముక్తి క‌ల్పిస్తున్నాన‌ని.. అత‌ను వాట్సాప్ మెసేజ్ చేశాడు. అది చ‌దివిని అత‌ని సోద‌రుడు వెంట‌నే ఆ ఇంటికి వెళ్లి జ‌రిగిన దారుణాన్ని చూశాడు.

అనంత‌రం పోలీసుల‌కు స‌మాచారం అందించ‌గా.. వారు సంఘ‌ట‌నా స్థ‌లానికి చేరుకుని మృత‌దేహాల‌ను పోస్ట్‌మార్టంకు త‌ర‌లించారు. ఆ ప్రొఫెస‌ర్‌పై కేసు న‌మోదు చేసి అత‌ని కోసం గాలిస్తున్నారు. కాగా ఆ ప్రొఫెస‌ర్ గ‌త కొంత కాలంగా తీవ్ర‌మైన డిప్రెష‌న్‌తో బాధ‌ప‌డుతున్నాడ‌ని, అందుకు అత‌ను చికిత్స కూడా తీసుకుంటున్నాడ‌ని వెల్ల‌డైంది. గ‌తంలో ఒక‌సారి భార్య‌ను చంప‌బోయాడ‌ని కూడా తెలిపారు. అయితే ఈసారి నిజంగానే త‌న కుటుంబం మొత్తాన్ని హ‌త్య చేశాడు.