T20 World Cup 2021 : వెస్టిండీస్‌పై స‌ఫారీలు అల‌వోక‌గా గెలుపు..!

T20 World Cup 2021 : దుబాయ్ వేదిక‌గా జ‌రిగిన ఐసీసీ టీ20 వ‌ర‌ల్డ్ క‌ప్ 2021 టోర్నీ 18వ మ్యాచ్‌లో వెస్టిండీస్‌పై సౌతాఫ్రికా విజ‌యం సాధించింది. వెస్టిండీస్ ఉంచిన ల‌క్ష్యాన్ని సౌతాఫ్రికా సునాయాసంగానే ఛేదించింది. ఈ క్ర‌మంలో విండీస్‌పై స‌ఫారీలు 8 వికెట్ల తేడాతో ఘ‌న విజ‌యం సాధించారు.

మ్యాచ్ లో టాస్ గెలిచిన సౌతాఫ్రికా ముందుగా ఫీల్డింగ్ ఎంచుకోగా.. వెస్టిండీస్ బ్యాటింగ్ చేప‌ట్టింది. ఈ క్ర‌మంలో విండీస్ జ‌ట్టు నిర్ణీత 20 ఓవ‌ర్ల‌లో 8 వికెట్ల న‌ష్టానికి 143 ప‌రుగులు మాత్ర‌మే చేయ‌గలిగింది. విండీస్ బ్యాట్స్‌మెన్ల‌లో ఎవిన్ లెవిస్ ఒక్క‌డే రాణించాడు. మొత్తం 35 బంతులు ఆడిన లెవిస్ 3 ఫోర్లు, 6 సిక్స‌ర్ల‌తో 56 ప‌రుగులు చేశాడు. మిగిలిన ఎవ‌రూ ఆక‌ట్టుకునే ప్ర‌ద‌ర్శ‌న చేయ‌లేదు. సౌతాఫ్రికా బౌల‌ర్ల‌లో డ్వెయినె ప్రిటోరియ‌స్ 3 వికెట్లు ప‌డ‌గొట్ట‌గా కేశ‌వ్ మ‌హారాజ్ 2 వికెట్లు తీశాడు. క‌గిసో ర‌బాడా, అన్‌రిక్ నోర్‌జెల‌కు చెరొక వికెట్ ద‌క్కింది.

అనంత‌రం బ్యాటింగ్ చేసిన సౌతాఫ్రికా 18.2 ఓవ‌ర్ల‌లో ల‌క్ష్యాన్ని ఛేదించింది. 2 వికెట్ల‌ను మాత్ర‌మే కోల్పోయి 144 ప‌రుగులు చేసింది. సౌతాఫ్రికా బ్యాట్స్‌మెన్‌ల‌లో ఎయిడెన్ మార్క‌ర‌మ్ 26 బంతుల్లో 2 ఫోర్లు, 4 సిక్స‌ర్ల‌తో 51 ప‌రుగులు చేసి నాటౌట్‌గా నిలిచాడు. రాసీ వాన్ డెర్ డుస్సెన్ 51 బంతుల్లో 3 ఫోర్ల‌తో 43 ప‌రుగులు చేసి నాటౌట్‌గా నిలిచాడు. మ‌రో బ్యాట్స్‌మెన్ రీజా హెండ్రిక్స్ 39 ప‌రుగులు చేశాడు. విండీస్ బౌల‌ర్ల‌లో అకియ‌ల్ హొసెయిన్‌కు 1 వికెట్ ద‌క్కింది.