Sankranthi 2022 : కేవలం భారతదేశంలోనే కాదు ప్రపంచవ్యాప్తంగా ఉన్న హిందువులు అందరూ జనవరి నెలలో మకర సంక్రాంతి పండుగను ఘనంగా జరుపుకుంటారు. మొత్తం మూడు రోజుల పాటు జరిగే ఈ పండుగలో భాగంగా తొలి రోజును భోగి పండుగ రూపంలో, రెండో రోజు సంక్రాంతిగా, మూడో రోజు కనుమగా జరుపుకుంటారు. ఈ క్రమంలోనే మూడు రోజులు భిన్నమైన పూజా కార్యక్రమాలను కూడా నిర్వర్తిస్తుంటారు.
ఇక ఈ ఏడాది సంక్రాంతి పండుగ జనవరి 15వ తేదీన వచ్చింది. ఈ క్రమంలోనే 14వ తేదీన భోగి పండుగను, 16వ తేదీన కనుమ పండుగను జరుపుకోనున్నారు. ఇక సంక్రాంతి రోజు.. అంటే 15వ తేదీ రోజు మధ్యాహ్నం 2.43 గంటల నుంచి సాయంత్రం 5.45 గంటల వరకు శుభ ముహుర్తం ఉంది. ఇది అన్ని పూజలకు అనుకూలం. కనుక ఎవరైనా పూజలు చేయదలిచినా.. ఏవైనా కొత్త వ్యాపారాలు ప్రారంభించాల్సిన వచ్చినా.. వాహనాలకు పూజ అయినా.. ఏ పూజ అయినా సరే.. ఈ సమయంలో చేస్తే అంతా మంచే జరుగుతుంది.
సంక్రాంతి పండుగ నుంచి ఉత్తరాయణం మొదలవుతుంది. ఈ రోజు నుంచి సూర్యుడు దక్షిణాయం వదిలి పెట్టి ఉత్తరాయణంలోకి ప్రవేశిస్తాడు. ఈ సమయంలో రైతుల పంట చేతికొస్తుంది. అన్ని కుటుంబాల్లోనూ సుఖ సంతోషాలు వెల్లవిరిస్తాయి. అందుకనే సంక్రాంతి పండుగను రైతులు పెద్ద ఎత్తున జరుపుకుంటారు.
