Mahesh Babu : శ్రీమంతుడు స్పూర్తితో జ‌రిగిన పాఠ‌శాల నిర్మాణం.. త‌న టీంను తీసుకొని అక్క‌డికి వ‌స్తానంటూ మ‌హేష్ హామీ..

Mahesh Babu : బీబీపేట మండల కేంద్రంలో దాత సుభాష్​రెడ్డి శ్రీమంతుడు చిత్ర స్పూర్తితో రూ.6 కోట్లు పెట్టి కట్టించిన హైస్కూల్​ బిల్డింగ్​ను మంత్రులతో కలిసి కేటీఆర్ ప్రారంభించారు. ‘‘చాలామంది దగ్గర పైసలుంటయి. కానీ సేవకు ముందుకు రారు. సుభాష్ రెడ్డి తాను చదివిన స్కూలుకు కొత్త బిల్డింగ్ ​కట్టించడం అభినందనీయం” అన్నారు కేటీఆర్‌.

తన నాయనమ్మ ఊరు బీబీపేట మండలం కోనాపూర్​ గవర్నమెంట్​ స్కూల్​ను శ్రీమంతుడు సినిమా స్ఫూర్తితో డెవలప్ చేస్తామని కేటీఆర్ చెప్పారు. బీబీపేటకు జూనియర్​ కాలేజీ మంజూరు చేస్తున్నట్టు విద్యా శాఖ మంత్రి సబితా ఇంద్రారెడ్డి ప్రకటించారు. అయితే శ్రీమంతుడు స్పూర్తితో స్కూల్ నిర్మాణం జ‌రిగింద‌ని తెలుసుకున్న మ‌హేష్ స్పందించారు. ఈ స్కూల్ నిర్మించడానికి కారణం శ్రీమంతుడు సినిమా అని తెలిసి ఎంతో సంతోషంగా అనిపిస్తోంది. సుభాష్ రెడ్డికి చేతులెత్తి దండం పెడుతున్నాను. మీరు నిజమైన హీరో.. మీ లాంటి వాళ్లే మాకు కావాలి. శ్రీమంతుడు టీంతో కలిసి కచ్చితంగా మీ పాఠశాలకు వస్తాం. ఈ గొప్ప ప్రాజెక్ట్ పూర్తయ్యాక మేం అక్కడికి వస్తామని మహేష్ బాబు త‌న ట్వీట్‌లో చెప్పుకొచ్చారు.

సుభాష్ రెడ్డి కొడుకు నేహాంత్ శ్రీమంతుడు సినిమా చూసి ఇలా కట్టించాలని అన్నాడట. దాంతో సుభాష్ ఆరు కోట్లు పెట్టి క‌ట్టించాడు. అయితే ఆ పాఠశాలను కేటీఆర్ ప్రారంభించారు.

ఇక్కడకు వచ్చాక తనకు ఆ విషయం తెలిసిందని.. లేదంటే మహేష్ బాబునే ఈవెంట్‌కు తీసుకొచ్చే వాడినని కేటీఆర్ అన్నారు. జూనియర్ కాలేజ్ కడుతున్నారు కదా ? అది పూర్తయిన తరువాత అప్పుడు మహేష్ బాబు తీసుకొద్దాం. ఆయన వస్తే ఇంకా పది మందికీ ఈ విషయం తెలుస్తుంది.. అని కేటీఆర్ ఈ స‌మావేశంలో మాట్లాడారు.